एजेन्सी – इटालियन सिरी ‘ए’ को शीर्षस्थानमा रहेको एसी मिलान पार्मासँगको हारबाट जोगिएको छ । घरेलु मैदानमा दुई गोलले पछि परेको अवस्थामा थियो हर्नान्डेजले दुई गोल गरेपछि मिलान हारबाट जोगिएको हो ।

पार्माका हेर्नानी र जस्मिन कुरटिकले गोल गर्दा मिलानका थियो हर्नान्डेजले दुवै गोल गरेका थिए । मिलानोमा आइतबार राति भएको खेलमा घरेलु टोली खेलको १३औं मिनेटमा पछि परेको थियो । जेर्भिन्होको पासमा हेर्नानीले गोल गर्दै पार्मालाई अग्रता दिलाएका थिए ।

२४औं मिनेटमा स्यामुइल क्यास्टेलेजोको गोलले भिएआरबाट मान्यता नपाउदा मिलान बराबरीबाट चुक्यो । ५६औं मिनेटमा मिलान २–० ले पछि पर्‍यो । जस्मिन कुरटिकले हेर्नानीको पासमा गोल गरेका थिए ।

त्यसको दुई मिनेटपछि नै थियो हर्नान्डेजले हकान कलहानोग्लुको पासमा गोल गर्दै मिलानलाई खेलमा फर्कने संकेत दिए । इन्ज्युरी समयको थप गरिएको पहिलो मिनेटमा हर्नान्डेजले व्यक्तिगत दोस्रो गोल गर्दै मिलानलाई २–२ गोलको बराबरीमा ल्याए ।

यो बराबरीसँगै मिलान ११ खेलबाट २७ अंक जोडेर शीर्षस्थानमा यथावत रहेको छ । पार्मा ११ अंक जोडेर १४औं स्थानमा रहेको छ ।

सिरी ‘ए’ कै अर्काे खेलमा इन्टर मिलानले १–० ले पछि परेको अवस्थामा काग्लिएरीमाथि ३–१ को पूनरागमन जित हात पारेको छ । इन्टरका निकोलो बरेल्ला, ड्यानियल डि एम्ब्रुसो र रोमेलु लुकाकुले गोल गरे । घरेलु टोलीका रिकार्डाे सोटटिलले गरेको गोल सान्त्वना बन्यो ।

यो जितसँगै इन्टन मिलान ११ खेलबाट २४ अंक जोडेर दोस्रो स्थानमा यथावत रहँदा पराजित काग्लिएरी १२ अंक जोडेर ११औं स्थानमा रहेको छ ।