एजेन्सी – पेरिस सेन्ट जर्मेन (पिएसजी) का सुपर स्टार नेयमारलाई खराब ट्याकल गरेका कारण लियोनका थिएगा मेन्डेसले सिधै रातो कार्डको सामना गरेका थिए ।

इन्जुरी समयमा गरिएको त्यो खराब ट्याकलले गोलीगाँठामा चोट लागेपछि नेयमारलाई स्ट्रेचरमा मैदान बाहिर लगिएको थियो । १–० ले पिएसजी हारेको त्यो खेलमा नेयमारको चोट टोलीका लागि अर्को दुःखद घटना बनेको थियो ।

त्यो घटनापछि मेन्डेसको परिवारलाई भने ज्यान मार्ने धम्की आउन थालेको बताइएको छ । स्ट्रेचरमा मैदान बाहिर लाँदा नेयमार रोइरहेका थिए । २८ वर्षे फरवार्डको अवस्था हेर्दा उनी लामो समय मैदान बाहिर रहनु पर्ने अनुमान गरिएको थियो ।

तर, पिएसजीको मेडिकल टोलीले भने चोट गम्भिर नभएको र आइतबार लिलविरुद्धको खेलमा खेल्न सक्ने सम्भावना रहेको बताएका छन् । ‘गल्ति हुन्छन् । तर म यहाँ नेयमारसँग माफी माग्न चाहन्छु,’ मिडफिल्डर मेन्डेसले भनेका छन्, ‘आशा छ चोट धेरै गम्भिर हुने छैन ।’

तर कट्टर समर्थकहरुका लागि त्यो माफीको धेरै अर्थ नहुन सक्छ । त्यसै कारण मेन्डेसको परिवार र श्रीमतीलाई ज्यानमार्ने धम्की दिइएको छ । सामाजिक सञ्जालमार्फत पनि उनको परिवारलाई धम्की दिइएको छ ।

‘यदि नेयमारलाई केहि भयो भने तिमिले जीवन दिएर मुल्य चुकाउनु पर्नेछ । तिम्रो र तिम्रो परिवारले एक-एक गरि ,’ एउटा सन्देश यस्तो समेत रहेको मेन्डेसकी श्रीमतीले बताएकी छिन् । उनले त्यो सन्देश पुलिसलाई पठाएको बताएकी छिन् ।