एजेन्सी – इंग्लिस क्लब म्यानचेस्टर युनाइटेडका उरुग्वेली फरवार्ड एडिन्सन काभानीलाई तीन खेलको प्रतिबन्ध सुनाइएको छ ।

इंग्ल्यान्ड फुटबल एसोसिएसन (एफए) ले काभानीले सामाजिक सन्जाल इन्स्टाग्राममा जातीय विभेद हुने गरी ‘नेग्रिटो’ लेखेको विषयलाई अध्ययन गर्दै तीन खेलको प्रतिबन्ध सुनाइएको हो ।

उनको त्यो पोस्टलाई अपमानजनक, अनुचित वा खेल बदनाममा ल्याइएको भनेर ठानिएको छ । इंग्लिस फुटबल गभर्निङ बडीले पनि उनको त्यो टिप्पणी जातीय विभेदको हुन खालको रहेको उल्लेख गरेको छ ।

एफएले जारी गरेको विज्ञप्तिमा उनले एफएको ई३३ अन्तरगतको नियम उल्लंघन गरेको आरोप लगाइएको छ । नियमअनुसार उनले ६ भन्दा बढी खेलको प्रतिबन्ध खेप्नुपर्ने भएपनि उनले तत्कालै पोस्ट हटाएर आफ्नो गल्ती स्वीकार गरेका कारण प्रतिबन्ध केही कम भएको पनि एफएले जनाएको छ ।

नोभेम्वर २९ मा साउथह्याम्टनमाथि ३–२ को पूनरागमन जित निकालेको खेलमा काभानीले दुई गोल गरेका थिए । त्यसपछि उनले इन्स्टाग्राममा जातीय विभेद ल्याउने खालको पोस्ट गरेका थिए । लगत्तै उनले आफनो पोस्ट हटाएका थिए ।

चोटका कारण पछिल्ला दुई खेलमा मैदान बाहिर रहेका ३३ वर्षीय काभानी अब कम्तीमा पनि जनवरी ४ सम्म मैदान बाहिर रहने एफएले जनाएको छ । काभानी यसै समरमा फ्रान्सेली क्लब पेरिस सेन्ट जर्मेन (पीएसजी) बाट फ्रि ट्रान्सफरमा युनाइटेडमा अनुबन्ध भएका थिए ।