एजेन्सी – खेलका दौरान रिसले चुर हुँदै विपक्षी खेलाडीलाई थुकेपछि फ्रान्सेली फरवार्ड मार्कस थुरामलाई जर्मन फुटबल संघले नगद जरिवानासँगै ६ खेल प्रतिबन्ध लगाएको छ ।

जर्मन क्लब बोरुसिया मोन्चेनग्लाडबाकबाट खेल्दै आएका थुरामले होफेनहाइमविरुद्ध गत साता भएको खेलमा दुर्व्यवहार गरेका थिए । उनले डिफेन्डर स्टेफान पोस्चलाई थुकेपछि रेफ्रीले खेलका दौरान नै उनलाई रातो कार्ड देखाएका थिए । उनले रातो कार्ड पाउँदा १-१ को बराबर रहेको खेलमा बोरुसिया २-१ ले पराजित भएको थियो ।

सन् १९९८ मा विश्वकप विजेता फ्रान्सेली राष्ट्रिय टोलीका सदस्य लिलियन थुरामका छोरा मार्कस पछिल्लो समय राम्रो लयमा थिए । २३ वर्षीय उनलाई संघले ४० हजार युरो (झन्डै ५७ लाख नेपाली रुपैयाँ) जरिवाना पनि गराएको छ । यसबाहेक क्लबले पनि उनलाई १ लाख ५० हजार युरो (२ करोड १५ लाख रुपैयाँ) बराबर रकम सामाजिक कार्यमा दान गर्नुपर्ने जनाएको छ ।

क्लबले विज्ञप्ति जारी गर्दै मार्कसले जरिवाना र कारवाही स्वीकारेको बताएका छन् । त्यस्तै उनी आफैंले पनि उक्त घटनापछि माफी मागेका छन् । ‘यो मेरो स्वभाव अनुसारको कार्य होइन । यो हुनै नपर्ने कार्य भयो । मैले गलत तरिकाले व्यवहार गरें र यो मैले जानेर गरेको होइन । म सबैसामु माफी माग्न चाहन्छु र यसको कारवाही सहर्ष स्वीकार्नेछु,’ उनले भने ।