एजेन्सी – इटालियन सिरी ‘ए’ मा युभेन्टसले घरेलु मैदानमा लज्जास्पद हार बेहोरेको छ । सिरी ‘ए’ मा सिजनको पहिलो हार बेहोर्ने क्रममा १० खेलाडीमा समेटिएको युभेन्टसले फियोरेन्टिनालाई ३–० ले नतिजा सुम्पिएको हो ।

युभेन्टसलाई स्तब्ध पार्न फियोरेन्टिनाका डुसान भ्लाहोभिक र मार्टिन कासेरेसले गोल गर्दा एक गोल उपहार पाएको थियो । एलिएन्ज स्टेडियम टोरिनोमा मंगलबार राति भएको खेलमा पाहुना टोली फियोरेन्टिनाले खेलको तेस्रो मिनेटमा नै डुसान भ्लाहोभिकको गोलबाट अग्रता लिएको थियो । उनले फ्रान्क रिवेरीको पासमा गोल गरेका थिए ।

एक गोलले पछि परेको युभेन्टस १८औं मिनेटमा १० खेलाडीमा समेटियो । जुवान क्वारड्राडोले गेइटानो कास्ट्रोभेल्लीलाई फल गरेपछि सुरुमा पहेलो कार्ड देखाएपनि भिएआरको सहाया लिदै रातो कार्ड देखाउदै मैदान बाहिर पठाएपछि युभेन्टस समस्यामा परेको थियो ।

१० खेलाडीमा समेटिएपनि युभेन्टसले फियोरेन्टिनालाई दवावमा राखेपनि ७६औं मिनेटमा एलेक्स सान्द्रोले आफ्नै पोस्टमा गोल गरेपछि युभेन्टसको खेलमा फर्कने सम्भावना सकिएको थियो । अम्राबातको प्रहार ब्लक भएपछि रिवाउन्डमा फ्रान्क रिवेरीले दिएको पासलाई क्रिस्टियानो बिराघीले क्रस गर्दा एलेक्स सान्द्रोले आफ्नै पोस्टमा गोल गर्न पुगेका थिए ।

८१औं मिनेटमा बिराघीकै पासमा मार्टिन कासेरेसले गोल गर्दै फियोरेन्टिनालाई ३–० ले अघि बढाए । त्यसपछि थप गोल निस्कन नसक्दा युभेन्टसले सिरी ‘ए’ मा पहिलो हार चाख्न बाध्य बन्यो ।

यो हारसँगै युभेन्टस १३ खेलबाट २४ अंक जोडेर चौथो स्थानमा झर्दा फियोरेन्टिना १४ अंक जोडेर १५औं स्थानमा उक्लिएको छ । युभेन्टस शीर्षस्थानको एसी मिलानसँग ७ अंकले पछि परिसकेको छ ।