एजेन्सी – स्पेनिस ला लिगामा एट्लेटिको म्याड्रिडले शीर्षस्थानमा स्पष्ट ३ अंकको अग्रता लिएको छ ।

रियल सोसिडाडमाथि २–० को सहज जित निकाल्दै एट्लेटिकोले शीर्षस्थानमा रियल म्याड्रिडलाई ३ अंकले पछि पारेको हो । यद्दपि एट्लेटिकोले रियलले भन्दा अझै एक खेल कम खेलेको छ ।

एट्लेटिको १३ खेलबाट ३२ अंक पुगेको छ । एक खेल बढी खेलेको रियलको २९ अंक छ । एट्लेटिकोले भन्दा तीन खेल बढी खेलेको सोसिडाडको २६ अंक छ ।

रियाले एरिनामा मंगलबार राति भएको खेलमा घरेलु टोली सोसिडाडमाथिको जितमा एट्लेटिकोका मारियो हर्माेसो र मार्काेस लोरेन्टेले गोल गरे दुवै गोल दोस्रो हाफमा सम्भव भएको थियो ।

प्रतिस्पर्धात्मक खेलको २०औं मिनेटमा डेभिड सिल्भा र मिकेल मेरिनोको वान टु वान पासमा विलियन जोसको प्रहार पोस्ट नजिकैबाट बाहिरिदा सोसिडाड अग्रता लिनबाट चुकेको थियो । २४औं मिनेटमा लुइस सुआरेज चुक्दा एट्लेटिकोले अग्रता लिन सकेन ।

४९औं मिनेटमा यान्निक कारास्कोको पासमा मारियो हर्माेसोले गोल गर्दै एट्लेटिकोलाई १–० को अग्रता दिलाए । ५५औं मिनेटमा कप्तान कोकीको पासमा कारास्को चुक्दा एट्लेटिकोले अग्रा बढाउन सकेन ।

७४औं मिनेटमा कारास्कोको पासमा मार्काेस लोरेन्टेले गोल गर्दै एट्लेटिकोको अग्रता दोब्बर पारे । ८४औं मिनेटमा मेर्किलान्जको २५ यार्ड टाढाको फ्रिकिकलाई गोलरक्षक जान ओब्लाकले उत्कृष्ट बचाउ गर्दा सोसिडाडले गोलअन्तर घटाउन सकेन ।

ला लिगामा सोसिडाडको यो लगातार तेस्रो हार हो । यसअघि सोसिडाड बार्सिलोना र लेभान्टेसँग समान २–१ ले पराजित भएको थियो ।

अन्य नतिजा
इल्चेविरुद्ध ओसासुना (२–२), भ्यालेन्सियाविरुद्ध सेभिया (०–१), हुएस्काविरुद्ध लेभान्टे (१–१), भालाडोलिडविरुद्ध बार्सिलोना (०–३), भिल्लारियलविरुद्ध एथलेटिको बिल्वाओ (१–१)