एजेन्सी – इंग्लिस प्रिमियर लिगको शीर्षस्थानमा रहेको लिभरपुल साउथह्याम्टनसँग स्तब्ध बनेको छ । पछिल्लो दुई खेलमा जित निकाल्न नसकेको लिभरपुल साउथह्याम्टनसँग उसकै मैदानमा १–० ले स्तब्ध बनेको हो ।

प्रिमियर लिगमा लिभरपुलको यो दोस्रो हार हो । यसअघि लिभरपुल एस्टन भिल्लासँग ७–२ ले पराजित भएको थियो । साउथह्याम्टनमा सोमबार राति भएको खेलमा लिभरपुल खेलको दोस्रो मिनेटमा नै पछि परेको थियो ।

ड्यानी विङ्सले जेम्स वार्ड प्रोउजको पासमा गोल गरेको थियो । एक गोलले पछि परेको लिभरपुलले त्यसपछि लगातार घरेलु टोलीलाई दवावमा राखेपनि गोल गर्न असमर्थ बन्यो ।

पाँचौ मिनेटमा मोहम्मल सलाहको पासमा रोबर्टाे फिर्मिनोको प्रहार पोस्ट नजिकैबाट बाहिरियो । १३औं मिनेटमा एलेक्सान्डर अर्नाेल्डको कर्नरमा कप्तान जोर्डन हेन्डरसनको प्रहार आकासियो । ३४औं मिनेटमा थियागो अलकान्ताराको पासमा साडियो मानेले गोल गर्न सकेनन् ।

४०औं मिनेटमा जोर्डन हेन्डरसनले अर्काे सुवर्ण अवसर गुमाउदा लिभरपुल बराबरीबाट चुक्यो । पहिलो हाफको इन्ज्युरी समयको थप गरिएको दोस्रो मिनेटमा मानेको प्रहारले पोस्टको दिशा लन सकेन ।

५८औं मिनेटमा मानेको प्रहारलाई स्टेफेन्सले उत्कृष्ट ब्लक गर्दै लिभरपुलको बराबरी टारे । ६८औं मिनेटमा फिर्मिनोको पासमा मानेको लो क्रस प्रहारलाई डियालोले उत्कृष्ट डिफेन्स गदै लिभरपुललाई निराश पारे ।

८४औं मिनेटमा साउथह्याम्टनले बराबरी गर्ने सुन्दर अवसर गुमायो । थ्रुबलमा भालेरीको प्रहारलाई हेन्डरसनले गोललाइनबाट क्लियर गरे । इन्ज्युरी समयको थप गरिएको तेस्रो मिनेटमा मानेको हेडर बाहिरिदा लिभरपुलले १–० को स्तब्धपुर्ण नतिजा आत्मसात गर्नुपर्‍यो ।

यो हारले लिभरपुलले शीर्षस्थानमा ३ अंकको अग्रता लिने अवसर गुमाएको छ । लिभरपुलको १७ खेलबाट ३३ अंक रहेको छ । एक खेल कम खेलेको म्यानचेस्टर युनाइटेडको पनि ३३ अंक छ । साउथह्याम्टन २९ अंक जोडेर छैटौ स्थानमा उक्लिएको छ ।