एजेन्सी – रियल म्याड्रिडसँगको सम्झौता नविकरणका विषयमा कप्तान सर्जियो रामोस अझै तयार भएका छैनन् । पछिल्ला छलफलहरु बाट दुई पक्ष सहमतीको निकै टाढा रहेको बताइएको छ ।

रक्षक रामोस र रियलका अध्यक्ष फलोरेन्टिनो पेरेजबीच छलफल भएपनि कुनै सहमति भने हुन सकेन । शनिबारला लिगाको खेल अघि उनीहरुबीच भालडेबेबासमा कुराकानी भएपनि त्यसले झन जटिलता बढाएको अनुमान गरिएको छ । सेल्टा भिगोको खेलअघि उनीहरु दुई जानाबीच टनेलमा पनि भेट भएको थियो ।

अहिलेकै पारिश्रमिकमा एक वर्षको सम्झौता नविकरणका लागि रियलले प्रस्ताव गरेको छ । तर, रामोस भने कम्तीमा दुई वर्षको नविकरण चाहन्छन् । त्यसमा पारिश्रमिक घटाउने विषय पनि उल्लेख छैन । कुनै छलफल विना पनि त्यो प्रस्ताव अघि बढोस भन्नेमा रामोस रहेको बताइन्छ ।

अब फेरि दुई पक्षबीच कहिले छलफल हुन्छ भन्ने कुनै टुंगो छैन । अब उनी आउने समरमा सरुवा हुनका लागि कुनै पनि क्लबसँग छलफल गर्न स्वतन्त्र छन् ।

अहिलेकै अवस्थामा हेर्दा रामोस वा लुकास भाज्क्वेजसँगको सम्झौता नविकरण तत्काल सम्भव देखिएको छैन । रियलका प्रशिक्षक जिनेदिन जिदान भने दुवैलाई यो सिजन पछि पनि क्लबमै चाहन्छन् ।

रामोससँगको विषय भनेको सम्झौता अवधिलाई लिएर हो । उनी एक वर्षको लागि मात्र सम्झौता गर्न तयार छैनन् । अर्को तर्फ भाज्क्वेजको भने पारिश्रमिक मुख्य विषय हो । क्लबले उनलाई अहिलेकै पारिश्रमिकमा नविकरणका लागि प्रस्ताव गरेको छ । तर उनी त्यो भन्दा राम्रो पारिश्रमिक पाउनुपर्ने पक्षमा छन् ।

दुवै विषय अहिलेका लागि जटिल देखिएको छ । यसको सहज समाधान देखिएको छैन । तर, त्यसका वावजुद पनि यी दुई खेलाडीका लागि क्लबले नयाँ प्रस्ताव राखेमा त्यो आश्चार्य भने हुने छैन ।