एजेन्सी – पेरिस सेन्ट जर्मेन (पिएसजी) का नवनियुक्त प्रशिक्षक मोउरोसियो पोचेटिनोले आफ्नो पहिलो खेलपछि युवा फरवार्ड केलियन एमबाप्पेको आलोचना गरे ।

अर्जेन्टिनी प्रशिक्षकको ‘डेब्यू’ खेलमा पिएसजीले लिग वान मा सेन्ट एटिएनसँग १–१ को बराबरी खेलेको थियो । पोचेटिनोले पहिलो खेलपछि नै टोलीमा परिवर्तन आवश्यक रहेको पनि बताएका छन् ।

‘म उनको प्रदर्शनबाट खुसी छु । तर उनले सुधार गर्न आवश्यक छ ,’ एमबाप्पेका बारेमा सोधिएको प्रश्नमा उनले भने, ‘उनी गोल गर्न, जित्न र अझै राम्रो खेल्न चाहन्छन् भन्नेमा म विश्वस्त छु । उनी पनि पक्कै निराश भएका छन् । सबै खेलाडी र टोलीले सुधार गर्नुपर्दछ ।’

पोचेटिनोले यसलाई सुरुवातका रुपमा मात्र लिएका छन् । ‘यो मात्र सुरुवात हो । हामी आएको तीन दिन मात्र भयो,’ उनले थपे, ‘दोस्रो हाफमा हामीले गोलका लागि धेरै मौका पाएका थियौं । हामी केहि दुर्भाग्यशाली रह्यो । गोल गर्न सकेनौं । तीन अंक लिन सकेनौं ।’

पोचेटिनोले पुनः प्रशिक्षण सम्हाल्न पाएकोमा खुसी व्यक्त गरे । ‘१४ महिनापछि जिम्मेवारीमा फर्कन पाउँदा खुसी छु,’ उनले थपे, ‘तर केहि असहज भयो । पछिल्लो समय ६२ हजार दर्शकका सामू उभिएको थिए ।’

कोरोनाका कारण अहिले युरोपमा विना दर्शक फुटबल खेलाइदै आएको छ । पिएसजी १८ खेलबाट ३६ अंक जोडेर दोस्रो स्थानमा उक्लन सफल भएको छ । समान ३६ अंक नै रहेपनि लिल गोलअन्तरमा तेस्रोमा छ । शीर्षस्थानको लियोनको ३९ अंक छ ।