काठमाडौं (हाम्रो खेलकुद) – धनकुटाको रारा फुटबल क्लबले टुबोर्ग संजोग स्मृति नकआउट फुटबल प्रतियोगिताको उपाधि जितेको छ । सताक्षीधाम स्पोर्टिङ क्लबलाई टाइब्रेकरमा ४–३ ले हराउँदै राराले उपाधि जितेको हो ।

मोरङ बेलबारीमा शनिबार भएको फाइनलमा निर्धारित समय गोलरहित बराबरीमा टुंगिएपछि टाइब्रेकरमा राराले बाजी मारेको थियो । टाइब्रेकरमा राराका सुनिल खड्का, बुद्ध चेम्जोङ, उमेश कार्की र सूर्य अधिकारीले गोल गरे । रुपेश केसीले भने गोल गर्न सकेनन् ।

सताक्षीधामका लागि एन्जल गुरुङ, प्रमोद चौधरी, शिशिर लेखीले गोल गरे । संजित राई र विशाल दर्जीले गोल गर्न सकेनन् । फाइनलमा राराका योगेश गुरुङ र रेजिन माझीले पहेलो कार्डको सामना गरेका थिए ।

विजेता टोलीले उपाधिसहित ५१ हजार ५ सय ५५ रुपैयाँ प्राप्त गर्यो । बेलबारी नगरपालिका मेयर ज्ञानेन्द्र सुवेदीलगायतले विजेता, उपविजेता टोलीका खेलाडीलाई पुरस्कृत गरे । बेलबारी फुटबल क्लबले आयोजना गरेको प्रतियोगितालाई बेलबारी नगरापालिकाले संयोजन गरेको थियो ।

टुबोर्ग मुख्य प्रायोजन रहेको प्रतियोगितामा सन्ध्या सारा युपिभिसी प्रोफाइल प्रालि प्रायोजक तथा मोरङ कन्ट्रसन प्रालि, सयपत्री मल्टी पर्पोज प्रालि र आदर्श बहुउद्देश्य कृषि फर्म सह प्रयोजक रहेको थियो । प्रतियोगितामा १० टोलीको सहभागिता थियो ।