एजेन्सी – इटालियन सिरी ‘ए’ मा नेपोलीले अग्रता जोगाउन नसक्दा हेलास भेरोनासँग ३–१ को लज्जास्पद हार बेहोरेको छ ।

घरेलु मैदानमा आइतबार राति भएको खेलमा हेलास भेरोनाको जितमा फेडेरिको डिमार्काे, एन्टोनिन बाराक र माटिया जाकाग्नीले गोल गरे । नेपोलीका हिर्भिङ लोजानोल गरेको गोल सान्त्वना बन्यो ।

खेलको पहिलो मिनेटमा नै लोजानोले गोल गर्दै नेपोलीलाई अग्रता दिलाएका थिए । उनले डिएगो डिम्मीको पासलाई सदुपयोग गरेका थिए । एक गोलले पछि परेको भेरोनाले सम्हालिएको खेल पस्कदै ३४औं मिनेटमा खेललाई बराबरीमा ल्याउन सफल भयो ।

फेडेरिको डिमार्काेले मार्काे डाभिड फाराओनाीको पासमा गोल गरेका थिए । ६२औं मिनेटमा एन्टोनिन बाराकले माटिया जाकाग्नीको पासमा गोल गर्दै भेरोनालाई २–१ ले अघि बढाए । ७९औं मिनेटमा जाकाग्नीले डार्काे लाजोभिकको पासमा गोल गर्दै नेपोलीलाई ३–१ ले स्तब्ध पारे ।

यो जितसँगै भेरोना १९ खेलबाट ३० अंक जोडेर आठौं स्थानमा उक्लदा नेपोली ३४ अंकसहित छैटौ स्थानमा रहेको छ ।

सिरी ‘ए’ कै अर्काे खेलमा लाजियोले सस्सुलोमाथि २–१ को पूनरागमन जित निकालेको छ । लाजियोको जितमा सेरगेज मिलिन्कोभिच साभिक र सिरो इमोबिलेले गोल गरे । सस्सुलोका फ्रान्सिस्को कापुटोले गरेको गोल सान्त्वना बन्यो ।

यो जितसँगै लाजियो ३४ अंक जोडेर सातौ स्थनमा उक्लिएको छ । पराजित सस्सुलो ३० अंक जोडेर नवौं स्थानमा छ ।

अन्य नतिजा
युभेन्टसविरुद्ध बोलोग्ना (२–०), जिनोआविरुद्ध काग्लिएरी (१–०), पार्माविरुद्ध साम्पडोरिया (०–२)