काठमाडौँ (हाम्रो खेलकुद) – सहिद स्मारक ‘बि’ डिभिजन लिग अन्तर्गत श्री कुमारी क्लब र एन.आर.टि क्लबबिचको खेलमा रेफ्रीलाई कुटपिट गर्ने अफिसियल र श्री कुमारी क्लबलाई अखिल नेपाल फुटबल संघले दुइ वर्ष प्रतिबन्ध गर्ने भएको छ।
बिहिबार बसेको एन्फाको अनुशासन समितिको बैठकले भिडियो र म्याच अफिसियलको लिखित रिपोर्ट अध्ययन गरेर सो निर्णय लिएको हो। निलम्बित हुनेमा श्री कुमारी क्लबका अध्यक्ष नकुल हमाल, टिम व्यवस्थापक अनुप अधिकारी लगायतका अफिसियल रहेका छन्।
अफिसियलसंगै संघले क्लबमाथि पनि सोहि कारवाही गर्ने उल्लेख गरेको छ। कारवाहीसंगै श्री कुमारीले ‘बि’ डिभिजनमा बाँकी रहेको दुइ खेल खेल्ने छैन र उसको ‘बि’ डिभिजनमा भने स्थान रहनेछ। दुइ वर्ष पछि पुन: बि डिभिजनबाट नै खेलमा संलग्न हुन पाउने पनि प्रावधान रहेको छ। श्री कुमारीको प्रतिवन्ध संगै ‘ए’ डिभिजनमा उक्लन अब च्यासल, एन.आर.टि र आर.सी.टिको सम्भावना बढी देखिएको छ।
