एजेन्सी – स्पेनिस ला लिगामा आज राति चार खेलमा प्रतिस्पर्धा हुदा रियल म्याड्रिडले घरेलु मैदानमा लेभान्टेको आतिथ्यता गर्दैछ । खेल नेपाली समयअनुसार राति ९ बजे हुनेछ ।

घरेलु मैदानमा हुने खेलमा रियल अंक नगुमाई शीर्षस्थानको एट्लेटिको म्याड्रिडसँगको अंक दुरी छोट्याउने योजनामा हुनेछ । दोस्रो स्थानमा रहेको रियलको १९ खेलबाट ४० अंक रहेको छ । एक खेल कम खेलेको शीर्षस्थानको एट्लेटिकोको ४७ अंक रहेको छ । लेभान्टेलाई हराउन सके रियलले अंक दुरी ४ अंकमा झार्नेछ ।

टोलीसँग करिम बेन्जेमा, इडेन हाजार्ड, भिनिसियस जुनियर, मार्काे एसेन्सियो, टोनी क्रुस, क्यासमिरो, लुका मोड्रिच, इस्को, लुकास भाज्क्वेज, फर्लान्ड मेन्डी, इडर मिलिटाओ, मार्सेलो, राफयल भरान, अल्भारो ओर्डिजोला र गोलरक्षक थिवाउट कोर्टुवा रहेका छन् ।

चोटका कारण कप्तान सर्जियो रामोसले खेल्ने सम्भावना न्युन रहँदा फेडे भाल्भेर्डे, नाचो फर्नान्डेज र रोड्रिगो टोलीमा हुनेछैनन् । यता, लेभान्टे पनि रियललाई उसकै मैदानमा स्तब्ध पार्दै अंक तालिका सुधार गर्ने दाउमा हुनेछ । लेभान्टे १९ खेलबाट २३ अंक जोडेर १२औं स्थानमा रहेको छ । रियललाई हराउन लेभान्टे नवौं स्थानमा उक्लनेछ ।

टोलीसँग ड्यानिय गोमेज, रोजर, मिकाइल माल्सा, जोस लुइस मोरालेस, रोचिना, पोस्टिगो र गोलरक्षक एइटरको साथ रहेको छ । यि दुई टोलीको पछिल्लो २१ खेलको नतिजामा रियल १४ खेलमा विजयी भएको छ । चार खेल लेभान्टेले आफ्नो पक्षमा पार्दा ३ खेल बराबरीमा सकिएको छ । गत अक्टोवरमा रियलले लेभान्टेलाई उसकै मैदानमा २–० ले पराजित गरेको थियो ।