एजेन्सी – ब्राजिली फरवार्ड ग्याब्रियल जेससको एकमात्र गोलमा इंग्लिस प्रिमियर लिगको शीर्षस्थानमा रहेको म्यानचेस्टर सिटीले सेफिल्ड युनाइटेडमाथि १–० को झिनो जित निकालेको छ ।

घरेलु मैदानमा शनिबार राति भएको खेलमा जेससले खेलको नवौं मिनेटमा गरेको गोल नै सिटीको जितमा निर्णायक बन्यो । उनले फेरान टोरेसको पासमा गोल गरेका थिए । सेफिल्डमाथि बल पोसेसनमा बलियो पकड बनाएपनि सिटीले थप गोल गर्न सकेन ।

शनिबार राति नै म्यानचेस्टर युनाइटेड आर्सनलसँग बराबरीमा रोकिएको पाइदा सिटीलाई पुगेको छ । यो जितसँगै सिटीले शीर्षस्थानमा ३ अंकको अग्रता लिएको छ । सिटीको २० खेलबाट ४४ अंक पुगेको छ । दोस्रो स्थानको म्यानचेस्टर युनाइटेडको २१ खेलबाट ४१ अंक छ । पराजित सेफिल्ड ८ अंक जोडेर पुछारमा छ ।

प्रिमियर लिगकै अर्काे खेलमा आर्सनल र म्यानचेस्टर युनाइटेडले गोलरहित बराबरी खेल्दै अंक बाँडेका छन् । दुवै टोलीले गोलका केही सुवर्ण अवसर सिर्जना गरेपनि सदुपयोग गर्न नसक्दा अंक बाड्न बाध्य बन्यो ।

यो बराबरीसँगै युनाइटेडले शीर्षस्थानको म्यानचेस्टर सिटीसँगको अंक दुरी कम गर्ने मौका गुमाएको छ । दोस्रो स्थानको युनाइटेडको ४१ अंक रहेको छ । शीर्षस्थानको सिटीको ४४ अंक छ । आर्सनल ३१ अंक जोडेर नवौं स्थानमा छ ।

अन्य नतिजा
एभर्टनविरुद्ध न्युक्यासल (०–२), क्रिस्टल प्यालेसविरुद्ध वल्भ्स (०–१), वेस्ट ब्रमविरुद्ध फुलहम (२–२), साउथह्याम्टनविरुद्ध एस्टन भिल्ला (०–१)