काठमाडौं (हाम्रो खेलकुद) – अखिल नेपाल फुटबल संघ (एन्फा) को विषयमा पाटन उच्च अदालतको पछिल्लो आदेशले कात्तिक ८ गतेका लागि तय भएको निर्वाचन अन्योलमा परेको छ । उच्च अदालतले शुक्रबार एन्फाको निर्वाचन प्रक्रिया कात्तिक ५ गतेसम्मका लागि स्थगित गर्न अन्तरिम आदेश दिएपछि नयाँ अध्यक्ष चयनको अवस्था अलमलमा परेको छ ।

एन्फाका पूर्व महासचिव लोकबहादुर शाही र पूर्व फिफा सहायक रेफ्री विनोद केसीले दिएको रिटमाथि न्यायधिश प्रेमराज कार्कीको एकल इजालसले निर्वाचन प्रक्रिया रोक्न आदेश दिएको छ । उच्च अदालतले मुद्दाका दुवै पक्षलाई कात्तिक ५ गते अन्तरिम आदेशबारे छलफल गर्न डोकेको छ ।
एन्फा निर्वाचन कमिटीले कात्तिक ८ गते रिक्त अध्यक्ष र उपाध्यक्ष पदका लागि निर्वाचन गर्ने गरि तयारी थालिसकेको थियो । अध्यक्षका लागि कार्यावहाक नरेन्द्र श्रेष्ठ र उपाध्यक्ष कर्मा छिरिङ शेर्पाले उम्मेदवारी दर्ता गराएका छन् । त्यस्तै श्रेष्ठको प्यानलबाट मणि कुवँर र शर्पाको प्यानलबाट दीपक खातीले उपाध्यक्षमा उम्मेदवारी दर्ता गराएका छन् । राष्ट्रिय टोलीका पूर्व कप्तान उपेन्द्रमान सिंहले पनि उपाध्यक्षमा उम्मेदवारी दिएका छन् । एन्फाको निर्वाचन समितिले कात्तिक ५ गते सम्म उम्मेदवारी फिर्ताको सिमा तोकेको थियो ।
यसै बर्षको सुरुआतमा एन्फाका तत्कालिन अध्यक्ष गणेश थापालाई फुटबलको सर्वोच्च निकाय फिफाले आर्थिक अनियमितता गरेको आरोपमा १० वर्षे प्रतिबन्ध लगाएपछि अध्यक्षको पद रिक्त रहेको थियो । त्यस्तै उपाध्यक्ष तथा तत्कालिन कार्यवाहक अध्यक्ष ललितकृष्ण श्रेष्ठको करेन्ट लागेर मृत्यु भएपछि उपाध्यक्ष पदि पनि खाली रहँदै आएको छ । एन्फा कार्यसमितिले नरेन्द्र श्रेष्ठलाई कार्यवहाक अध्यक्ष तोकेर काम दैनिक कामकारवाही गर्दै आएको छ ।