काठमाडौं (हाम्रो खेलकुद) – रुस्लान थ्री स्टार क्लबले आफ्ना पूर्व कप्तान कृष्णबहादुर श्रेष्ठलाई आइतबार सम्मान गरेको छ । आइतबारनै ६४ बर्षमा प्रवेश गरेका श्रेष्ठ क्लबका कार्यसमिति सदस्य पनि हुन् । उनी झन्डै डेढ दशक क्लबको व्यवस्थापक समेत रहेका थिए । पछिल्लो समय उनी अस्वस्थ छन् ।
सोही अवसरमा क्लबले हालै भारतको गुवाहाटीमा सम्पन्न ६४ औं भारत रत्न बोर्डोलोइ ट्रफीको विजेता टोलीलाई सम्मानित गरेको थियो । शुक्रबार भएको फाइनलमा थ्री स्टारले इस्ट बंगाललाई २–१ ले पराजित गरेको थियो । उपाधिसहित १६ लाख रुपैयाँ जितेको थ्री स्टारको टोली शनिबार स्वदेश फर्केको थियो । दोस्रो पटक प्रशिक्षकको जिम्मेवारी सम्हालेको पहिलो प्रतियोगितामा नै मेघराज केसीले क्लबलाई उपाधि दिलाएका छन् । उनले पहिलो कार्यकालमा पनि थ्री स्टारलाई पहिलो उपाधिका रुपमा ब्रिटिस गोर्खा कप जिताएका थिए ।
