एजेन्सी – इंग्लिस प्रिमियर लिगमा लन्डन क्लब आर्सनल एस्टन भिल्लासँग पराजित भएको छ । भिल्ला पार्कमा शनिबार राति भएको खेलमा आर्सनल घरेलु टोलीसँग १–० ले पराजित भएको हो ।

प्रिमियर लिगमा आर्सनलको यो लगातार दोस्रो हार हो । यसअघि आर्सनल वल्भ्ससँग २–१ ले पराजित भएको थियो । घरेलु टोलीको जितमा ओले वाटकिन्सले पहिलो हाफमा गरेको गोल नै निर्णायक बन्यो । उनले खेलको दोस्रो मिनेटमा बर्टान्ड ट्राओरेको पासमा गोल गरेका थिए ।

सम्हालिन नपाउँदै एक गोलले पछि परेको आर्सनलले त्यसपछि घरेलु टोलीलाई बल पोसेसनमा दवाव राखेपनि भिल्लाको बलियो रक्षापङ्तिलाई तोड्न नसक्दा पराजित हुन पुग्यो । भिल्लाले सुरुवातमै लिएको अग्रता अन्तिमसम्म जोगाउदै महत्वपुर्ण ३ अंक जोड्न सफल भयो ।

२८औं मिनेटमा ग्रानिट झाकाको फ्रिकिकलाई आर्सनलकै पूर्व गोलरक्षक इमिलियानो मार्टिनेजले विफल पारे । ३०औं मिनेटमा रस बार्कलेको पासमा बर्टान्ड ट्राओरे चुक्दा भिल्ला अग्रता दोब्बर पार्नबाट चुक्यो । ४४औं मिनेटमा पेपे चुक्दा आर्सनल पनि बराबरीबाट चुक्यो ।

६८औं मिनेटमा पेपेको प्रहारमा मार्टिनेज नै बाधक बने । ८३औं मिनेटमा बुकायो साकासँगको वान टु वान पासमा इमिल स्मिथ रोविले मिलाइदिएको पासमा यसै विन्टरमा स्पेनिस क्लब रियल म्याड्रिडबाट आर्सन्ल आएका मार्टिन ओडेगार्डको प्रहारले पोस्टको गति लिन सकेन ।

यो जितसँगै एस्टन भिल्ला २१ खेलबाट ३५ अंक जोडेर आठौं स्थानमा उक्लदा पराजित आर्सनल २३ खेलबाट ३१ अंक जोडेर १०औं स्थानमा रहेको छ ।