एजेन्सी – यो सिजन तुलनात्मक रुपमा कमजोर प्रदर्शन गरिरहेको बोरुसिया डर्टमुन्डले जर्मन बुन्डेसलिगामा सिजनको आठौं हार बेहोर्दा शनिबार राति फ्रेइवर्गसँग २–१ ले पराजित भएको छ ।

पछिल्लो पाँच खेलमा डर्टमुन्डको यो तेस्रो हार हो । डर्टमुन्ड यसअघि बायर लिभरकुसन र बोरुसिया मोन्चेनग्लाडवाकसँग पराजित भएको थियो । फ्रेइवर्गको जितमा वु यिओङ जिओङ र जोनाथनले गोल गरे । डर्टमुन्डका युस्सोउफा मौकाकोले गोल गरेपनि हार टार्न सकेन ।

फ्रेइवर्गमा शनिबार राति भएको प्रतिस्पर्धात्मक बनेको खेलको ४९औं मिनेटमा वु यिओङ जिओङको गोलबाट घरेलु टोलीले अग्रता लिएको थियो । उनले भिन्सेन्जो ग्रिफोको पासमा गोल गरेका थिए । ५२औं मिनेटमा जोनाथनले गोल गर्दै फ्रेइवर्गको अग्रता दोब्बर पारे ।

दुई गोलले पछि परेपछि सम्हालिएको खेल पस्कदै घरेलु टोलीलाई दवावमा राख्दै एक गोल गरेपनि डर्टमुन्डले हार टार्न सकेन । ७६औं मिनेटमा १६ वर्षीया युस्सोउफा मौकाकोले एर्लिङ ब्राउट हालान्डको पासमा गोल गर्दै खेललाई २–१ को अवस्थामा ल्याएपनि त्यसपछि थप गोल निस्कन नसक्दा हार भोग्न पुग्यो ।

यो हारसँगै डर्टमुन्ड २० खेलबाट ३२ अंक जोडेर छैटौ स्थानमा रहेको छ । डर्टमुन्ड शीर्षस्थानको बायर्न म्युनिखसँग १६ अंकले पछि परिसकेको छ । डर्टमुन्डलाई हराएको फ्रेइवर्ग ३० अंकसहित आठौं स्थानमा छ ।

बुन्डेसलिगाकै अर्काे खेलमा शीर्षस्थानको बायर्नलाई पछ्याइरहेको आरबी लाइप्जिगले साल्केलाई ३–० ले पराजित गरेको छ । लाइप्जिगको जितमा नोर्दी मुकिले, मार्सेल सवित्जर र विल्ली ओर्वानले गोल गरे ।

जितसँगै लाइप्जिगको २० खेलबाट ४१ अंक पुगेको छ । लाइप्जिग शीर्षस्थानको बायर्नसँग ७ अंकले पछि छ । पराजित साल्के ८ अंक जोडेर पुछारमा रहेको छ ।