दुहबी (हाम्रो खेलकुद)– वडा नं १० सुनसरीको दुहबीमा जारी तेस्रो मेयर कप फुटबल प्रतियोगिताको फाइनलमा प्रवेश गरेको छ ।

वडा नं ४ लाई सोमबार पेनाल्टीसुटआउटमा ४–२ ले हराउँदै वडा नं १० मेयर कपको उपाधिनजिक पुगेको हो । अब वडा नं १० ले उपाधिका लागि वडा नं ७ सँग प्रतिस्पर्धा गर्नेछ । आइतबार वडा नम्वर ७ ले वडा नम्वर ६ लाई ४–२ ले हराउदै फाइनलमा स्थान पक्का गरेको थियो ।

फाइनल बुधबार हुनेछ । दुहवीमा सोमबार भएको खेलमा निर्धारित समयको खेल २–२ गोलको बराबरीमा टुंगएपछि खेलको निर्णण् पेनाल्टी सुटआउटबाट लिइएको थियो । वडा नं १० का समित चौधरी, प्रलाद चौधरी, कुन्दन चौधरी र कबिन्द्र चौधरीले गोल गरे ।

वडा नं ४ का मुकेश चौधरी र अलव दुलालले गोल गर्दा श्रवण ऋषिदेव र सुरज राजवंशीले गोल गर्न सकेनन् । त्यसअघि दुहवीमा भएको खेलमा वडा नं १० ले कबिन्द्र चौधरीको गोलबाट खेलको १५औं मिनेटमा अग्रता लिएको थियो ।

१६औं मिनेटमा श्रवण रिसिदेवले गोल गर्दै खेललाई १–१ गोलको बराबरीमा ल्याए । ३८औं मिनेटमा कबिन्द्रले गोल गर्दै वडा नं १० लाई २–१ ले अघि बढाए । ६१औं मिनेटमा सुरज राजवंशीले पेनाल्टीमार्फत गोल गर्दै खेललाई २–२ गोलको बराबरीमा ल्याए ।

विजयी टोलीका कबिन्द्र चौधरी खेलको म्यान अफ दि म्याच घोषित भए । उनलाई दुहवी नगरपालिका सुनसरीका उपमेयर सुनिता दाहाल शाहले २ हजार रुपैयाँ सहित मेडल हस्तान्तरण गरे ।

दुहबी नगरपालिकाको आयोजना तथा दुहबीको एलेभन एरोज क्लबले संयोजन गर्ने प्रतियोगिताको विजेताले उपाधिसहित १ लाख १ हजार १ सय र दोस्रो हुने टोलीले ५१ हजार १ सय ११ रुपैयाँ प्राप्त गर्नेछ ।

त्यस्तै प्रतियोगिताका सर्वोत्कृष्ट खेलाडीले ७ हजार, सर्वाधिक गोलकर्ताले ६ हजार र विधागत उत्कृष्ट गोलकिपर, डिफेन्डर, मिडफिल्डर र फरवार्डले समान ५ हजार रुपैयाँ प्राप्त गर्नेछन् ।