काठमाडौं (हाम्रो खेलकुद) – संयुक्त नैकापले बडा दशै र दिपावलीको अवसरमा तथा नैकाप मैदानलाई राष्ट्रिय स्तर बनाउने उद्देश्यका साथ यसै महिनाको अन्त्यमा नैकाप गोल्डकप फुटबल प्रतियोगिता आयोजना गर्ने भएको छ । चन्द्रागिरी नगरपालिका वडा नं २५ स्थित नैकाप मैदानमा असोज २९ गते देखि कात्तिक १४ गते सम्म नैकाप गोल्डकप सञ्चालन हुने आयोजक समितिका सदस्य रवि बुढाथोकीले जानकारी दिए ।
नैकाप मैदानलाई राष्ट्रिय रंगशालाका रुपमा निर्माण गर्न उपयुक्त भएकोले नैकाप गोल्डकप मार्फत सन्देश दिनका लागि प्रतियोगिता आयोजना गरिएको संयोजक रामहरी बस्नेतले बताए । उनले मैदानको स्तरउन्नतीका लागि सरकारीस्तरमै पहल सुरु भइसकेको जानकारी समेत दिए । दर्ता भएका कुनै पनि क्लब तथा संघ संस्थाले भाग लिन पाउने प्रतियोगितामा बढीमा ३२ टोलीलाई सहभागिता रहने बताइएको छ । नकआउटका आधारमा हुने प्रतियोगिता सञ्चालनका लागि एन्फासँग रेफ्री उपलब्ध गराउन पत्राचार गरिएको आयोजकले जानकारी दिए । स्थानिय क्लबको पनि सहभागिता रहने प्रतियोगितामा हरेक टोलीले सहभागिताका लागि१० हजार रुपैयाँ दर्ता शुल्क बुझाउनुपर्नेछ ।
नैकाप गोल्डकपको विजेतालाई ट्रफीसहित २ लाख तथा उपविजेतालाई ट्रफीसहित १ लाख रुपैयाँ नगद पुरस्कार प्रदान गरिनेछ । त्यस्तै प्रतियोगिताका उत्कृष्ट खेलाडी र उच्च गोलकर्तालाई १०÷१० हजार रुपैयाँ प्रदान गरिनेछ ।
