एजेन्सी – युइएफए च्याम्पियन्स लिगको प्रि–क्वाटरफाइनलको दोस्रो लेगमा आज राति इंग्लिस क्लब म्यानचेस्टर सिटीले घरेलु मैदानमा जर्मन क्लब बोरुसिया मोन्चेनग्लाडवाकको आतिथ्यता गर्दैछ ।

खेल इतिहाद स्टेडियममा नेपाली समयअनुसार राति १ः४५ बजे हुनेछ । पहिलो लेगमा २–० को अवे जित निकालेको सिटी घरेलु मैदानमा पनि जित निकाल्दै क्वाटरफाइनल पुग्ने दाउमा हुनेछ । उच्च लयमा सिटीले इंग्लिस प्रिमियर लिगमा म्यानचेस्टर युनाइटेडसँग २–० ले पराजित भएपछि लगातार दोस्रो जित निकालिसकेको छ । त्यसअघि सिटी २८ खेलसम्म अपराजित रहेको थियो ।

सिटीलाई अघिल्लो चरण प्रवेश गर्न बराबरीको नतिजा र १–० को हारले पनि केही फरक पार्ने छैन । तर सिटी जितको लक्ष्यसहित मैदान उत्रनेछ । टोलीसँग रहिम स्टर्लिङ, गाब्रियल जेसस, सर्जियो अगुइरो, रियाद महारेज, इल्केए गुन्डोगान, फर्नान्डिन्हो, केभिन डि ब्रुयन, एमेरिक लापोर्ट, रुवेन डियास, केएल वाल्कर र गोलरक्षक इडर्सन मोराएसको साथ रहेको छ ।

यता, मोन्चेनग्लाडवाक पनि सिटीलाईै स्तब्ध पार्दै क्वाटरफाइनल पुग्ने दाउमा हुनेछ । मोन्चेनग्लाडवाकलाई अघिल्लो चरण प्रवेश गर्न सिटीविरुद्ध कम्तीमा पनि ३–० को जित निकाल्नुपर्ने हुन्छ । जुन टोलीका लागि निकै कठिन हुनेछ । २–० को जित निकाल्न सकेको अवस्थामा पनि सम्भावना जीवितै रहनेछ ।

टोलीसँग एलासेन प्लेया, मार्कुस थुराम, लार्स स्टिन्डिल, जोनस होफमन, फ्लोरियन नेउहस, डेनिस जाकारिया, म्याथियस जिन्टर र गोलरक्षक यान सोम्मेरको साथ रहेको छ । यि दुई टोलीबीचको पाँच भेटमा सिटी चार खेलमा विजयी हुदा एक खेल बराबरीमा सकिएको छ । सिटी मोन्चेनग्लाडवाकसँग अपराजित रहने सुरमा रहँदा मोन्चेनग्लाडवाक सिटीमाथिको जितविहीन यात्रा टुंग्याउने लक्ष्यमा हुनेछ ।