एजेन्सी – स्पेनिस क्लब एटलेटिको म्याड्रिडलाई पराजित गर्दै इंग्लिस क्लब चेल्सी यूईएफए च्याम्पियन्स लिगको क्वाटरफाइनलमा प्रवेश गरेको छ ।

घरेलु मैदान स्टामफर्ड ब्रिजमा स्पेनी टोलीलाई २-० ले पराजित गर्दै चेल्सीले समग्रमा ३-० को जित दर्ता फरेको हो । चेल्सीले पहिलो लेगमा १-० को जित हात पारेपछि दोस्रो लेगमा जित हासिल गर्दा हाकिम जिएच र एमर्सन पाल्मेरीले १-१ गोल गरे ।

खेलको ३४ औं मिनेटमा टिमो वेर्नरको पासमा जिएचले गोल गरेका थिए । वेर्नर र काइ हाभर्ट्जले बनाएको आक्रामक मुभ गोलमा परिणत भएपछि चेल्सी सहज अवस्थामा पुगेको थियो । बल पोसेसनमा पकड जमाएपनि चेल्सीले आक्रमण भने खासै बुन्न सकेको थिएन ।

जिएचको गोलपछि भने एटलेटिकोले खासै प्रभाव जमाउन सकेन । खेलको अन्तिम मिनेटमा एमर्सनले गोल गर्दै चेल्सीको जित सुनिश्चित गरेका थिए । त्यसअघि डिफेन्डर एन्टोनियो रुडीगरलाई कुइनोले हानेपछि म्याड्रिडका डिफेन्डर स्टेफान साभिचले सिधै रेड कार्ड पाएका थिए ।

चेल्सीमा प्रशिक्षक थोमस टुचेलको आगमनसँगै टोली लयमा फर्किएको छ । टुचेलले खेलाएको १३ खेलमध्य अपराजित रहेको टोलीले ११ खेलमा कुनै गोल खाएको छैन । आक्रमणमा पनि टोली सुदृढ देखिंदै आएको छ । विशेषगरी जर्मन खेलाडीद्वय वेर्नर र हाभर्ट्जको प्रदर्शनमा सुधार आएको छ ।

यता ला लिगाको शीर्ष स्थानमा रहेको एटलेटिको भने च्याम्पियन्स लिगबाट बाहिरिएपछि अब रियल म्याड्रिड र बार्सिलोनालाई पछि पार्दै लिग उपाधि जित्ने ध्यानमा रहनेछ । पछिल्लो दशक दुई पटक फाइनल पुगेको टोली यसपटक क्वाटरफाइनलमा पनि पुग्न सकेन ।