एजेन्सी – साविक विजेता जर्मन क्लब बायर्न म्युनिख युइएफए च्याम्पियन्स लिगको क्वाटरफाइनलमा प्रवेश गरेको छ । बुधबार राति इटालियन प्रतिद्वन्द्वी लाजियोलाई २–१ ले तथा समग्रमा ६–२ को जित निकाल्दै बायर्नले अन्तिम आठमा स्थान पक्का गरेको हो ।

पहिलो लेगमा बायर्न ४–१ ले विजयी भएको थियो । बायर्नको जितमा रोबर्ट लेवान्डोस्की र इरिक म्याक्सिम चुपो मोटिङले गोल गर्दा लाजियोका मार्काे पारोलोले एक गोल फर्काए । घरेलु मैदान एलिएन्ज एरिना म्युनिखमा बायर्नले खेलको ३३औं मिनेटमा रोबर्ट लेवान्डोस्कीको पेनाल्टी गोलबाट अग्रता लिएको थियो । भेडाट मुरिकीले लियोन गोरेट्ज्कालाई पेनाल्टी बक्समा फल गरेपछि प्राप्त पेनाल्टीमा लेवान्डोस्की चुकेनन् ।

७३औं मिनेटमा सव्सिच्युट इरिक म्याक्सिम चुपो मोटिङले मैदान प्रवेश गरेको दोस्रो मिनेटमा गोल गर्दै बायर्नको अग्रता दोब्बर पारे । ७१औं मिनेटमा लेवान्डोस्कीको स्थानमा मैदान प्रवेश गरेका मोटिङले डेभिड अलवाको पासमा गोल गरेका थिए । ८२औं मिनेटमा मार्काे पारोलोले एन्ड्रियस पेरेइराको पासमा गोल गर्दै खेललाई २–१ को अवस्थामा ल्याए । त्यसपछि थप गोल निस्कन नसक्दा बायर्न विजयी हुन सफल भयो ।

यससँगै च्याम्पियन्स लिगको क्वाटरफाइनल समिकरण पुरा भएको छ । जसमा तीन इंग्लिस क्लब लिभरपुल, चेल्सी र म्यानचेस्टर सिटी, दुई जर्मन क्लब बायर्न र बोरुसिया डर्टमुन्ड, फ्रेन्च क्लब पीएसजी, पोर्चुगिज क्लब एफसी पोर्टाे र स्पेनिस क्लब रियल म्याड्रिड रहेका छन् ।