एजेन्सी – कतार विश्वकप २०२२ को युरोपियन छनोटको दोस्रो राउन्डको खेलमा आज राति चेक रिपब्लिकले घरेलु मैदानमा बेल्जियमको आतिथ्यता गर्दैछ ।

खेल सिनोवो स्टेडियम प्राहामा नेपाली समयअनुसार राति १ः३० बजे हुनेछ । पहिलो राउन्डको खेलमा दुवै टोलीले सफलता हात पारेका कारण दुवै टोली दोस्रो जितको खोजीमा हुनेछ । चेकले पहिलो खेलमा इस्टोनियामाथि ६–२ को जित निकाल्दा बेल्जियमले वेल्सलाई ३–१ ले हराएको थियो ।

घरेलु मैदानमा हुने खेलमा चेक बेल्जियमलाई हराउदै आफ्नो शीर्षतालाई बलियो बनाउने लक्ष्यमा हुनेछ । टोलीसँग अघिल्लो खेलमा ह्याट्रिक प्रहार गरेका थोमस सौसेक, प्याट्रिक सिक र एन्टोनिन बराकको साथ रहेको छ । यस्तै जान्कटो, डारिदा, प्रोभोड, बोरिल, कुदेला, सेलुस्टका काडेराबेक र गोलरक्षक पाभलेन्का टोलीमा रहेका छन् । चेक पछिल्लो तीन खेलमा अपराजित छ ।

यता, बेल्जियम पनि घरेलु टोलीलाई हराउदै शीर्षस्थानमा उक्लने दाउमा हुनेछ । समान ३ अंक भएपनि गोल अन्तरमा बेल्जियम दोस्रो स्थानमा रहेको छ । टोलीसँग रोमेलु लुकाकु, थोर्गन हाजार्ड, केभिन डि ब्रुयन, ड्रिएस मेर्टिन्स, युरी टिलेमान्स, थोमस म्युनिएर, टोवी एल्डरवेइरिल्ड, थोमस भर्मालेन र गोलरक्षक थिवाउट कोर्टुवाको साथ रहेको छ ।

बेल्जियमले नेसन्स लिगमा इंग्ल्यान्डसँग २–१ ले पराजित भएपछि पछिल्लो ५ खेलमा शतप्रतिशत जित निकालेको छ । बेल्जियम सोही अपराजित यात्रालाई निरन्तरता दिने योजनामा हुनेछ । यि दुई टोली दोस्रोपटका आमने सामने हुन लागेको हो । यसअघि यि दुई टोलीबीच २०१७ मा मैत्रीपुर्ण खेल हुदा बेल्जियम २–१ ले विजयी भएको थियो ।

यही समूह ‘ई’ को अर्काे खेलमा आज राति बेलारुस र इस्टोनियाबीच प्रतिस्पर्धा हुदैछ । विश्वकप छनोटमा बेलारुसले पहिलो खेल खेल्दा इस्टोनियाको यो दोस्रो खेल हो । इस्टोनिया पहिलो खेलमा चेक रिपब्लिकसँग ६–२ ले पराजित भएको थियो ।