विजय नेपाली,पोखरा

संकटा क्लब पहिलो पटक आहा रारा गोल्डकप फुटबल प्रतियोगिताको उपाधि जित्न सफल भएको छ । पोखरा रंगशालामा शनिबार अफ्रिकन रुट्स एसोसिएसन (एआरए) लाई टाइब्रेकरमा ४–२ ले हराउँदै ए डिभिजन टोली संकटा च्याम्पियन बनेको हो ।

गोलकिपर राजा बाबु थापाको उत्कृष्ट प्रदर्शबाट संकटाले पेनाल्टी सुटआउटमा निकाल्दै उपाधि उचाल्न सफल भएको हो । टाइब्रेकरमा एआरएका दुई खेलाडीले सदुपयोग गर्न नसक्दा संकटाका अमित तामाङ, सुवास गुरुङ, निरज बस्नेत, आयुष घलानले गोल गरे । सरोज दाहालको प्रहार एआरएका गोलकिपरले रोके । एआरएका यानिक र रिमले गोल गरे । कुइटेको प्रहार बाहिरिएको थियो भने एमबाकोपको प्रहार संकटाका गोलकिपर बचाए ।

निर्धरित ९० मिनेट र थप समय १–१ बराबरीमा टुंगिएपछि टाइब्रेकरमा संकटाले बाजी मारेको थियो । १–० ले पछि परेको खेल उल्टाउँदै संकटाले सफलता हासिल गरेको थियो । ग्लोरीको गोलबाट संकटा खेलमा फर्केको थियो । उनले ५२ औं मिनटमा गोल गरेका थिए । त्यस अघि एआरएले ११ औं मिनटमा मौसाको पासमा ज्याक्स बासिकको गोलबाट अग्रता लिएको थियो ।

विजेताले संकटाले उपाधिसहित १० लाख एक हजार र उपविजेताले ५ लाख एक हजार पुरस्कार प्राप्त गर्यो। सहारा क्लब पोखरामा आयोजित आहा रारा गोल्डकपमा यस पटक ८ टोलीको सहभागिता थियो ।