सुनील गाउँले, बारा
विश्वकर्मा सिमेन्ट एघारौं जीतपुरसिमरा गोल्डकप फुटबल प्रतियोगितामा बुधबार त्रिभुवन आर्मी फुटबल क्लबले जित हासिल गरेको छ । आर्मीले बी डिभिजन क्लब वीरगञ्ज युनाईटेडलाई ४–१ ले हराएको छ ।

पहिलो टोली भारतको बेंगलुरु एफसीसँग एएफसी कपको प्ले अफ खेलिरहँदा आर्मीको अर्को टोलीले सिमरा रंगशालामा वीरगन्जसँग प्रतिस्पर्धा गरेको थियो । आर्मीलाई जित दिलाउन जर्जप्रिन्स कार्कीले २ तथा सन्तोष केसी र सुसान्त चौधरी समान एक गोल गरे ।

खेलको चौधौं मिनटमा सन्तोषको गोलबाट अग्रता लिएको आर्मीले पहिलो हाफमै ३–१ को फराकिलो अन्तर बनायो । घरेलु दर्शकको समर्थन पाएको वीरगञ्जविरुद्ध आक्रामक बनेको आर्मीका लागि ४१ औं मिनटमा जर्ज प्रिन्सले गोल गर्दै अग्रता दोब्बर पारे । पहिलो हाफको इन्जुरी समयमा सुसान्तको गोलबाट आर्मीले अग्रता फराकिलो पार्दै वीरगञ्जका समर्थकलाई निराश पारे ।

दोश्रो हाफमा सम्हालिन नपाउँदै वीरगञ्जविरुद्ध जर्जप्रिन्सले अर्को गोल थपे । खेलको ४८ औं मिनटमा सुसान्तको क्रसमा जर्ज प्रिन्सले गोल गरेका थिए । ४–० ले पछि परेको वीरगञ्जका लागि खेलको ६१ औं मिनटमा चतुर्धन चौधरीले गोल गरेपनि खेलमा फर्कन सकेन । स्थानीय खेलाडी समेटेर मैदान उत्रिएको वीरगञ्ज आर्मी सामु नीरिह बन्दै प्रतियोगिताबाट बाहिरीयो ।

खेलमा वीरगञ्जले बनाएका केही आकर्षक अवसर आर्मीका गोलरक्षक महेश्वर श्रेष्ठले विफल पारेका थिए । खेलको म्यान अफ दि म्याच आर्मीका जर्जप्रिन्सले ५ हजार रुपैयाँ प्राप्त गरे । प्रतियोगिता अन्तर्गत बिहीबार भरतपुर फुटबल क्लब चितवन र बागमती युवा क्लब सर्लाहीबीच हुने आयोजक नवजनजागृती युवा क्लब सिमराका अध्यक्ष रामचन्द्र लामाले जानकारी दिए ।