एजेन्सी – एफए कपको पहिलो सेमिफाइनलमा आज राति लन्डन क्लब चेल्सीले म्यानचेस्टर सिटीको सामना गर्दैछ । खेल वेम्बली स्टेडियममा नेपाली समयअनुसार राति १०ः१५ बजे हुनेछ ।

प्रिमियर लिगको शीर्षस्थानमा रहेको सिटीलाई हराउँदै चेल्सी एफए कपको फाइनलमा पुग्ने दाउमा हुनेछ । टोलीसँग मासन माउन्ट, काई हाभर्टज, मार्काेस अलन्सो, जर्गिन्हो, रिस जेम्स, एङ्गोलो कान्टे, आन्द्रेस क्रिस्टेन्सेन, एन्टेनियो रुडिगर, सिजर एज्पिलिक्वेटा र गोलरक्षक इडुआर्ड मेन्डी रहेका छन् । यस्तै टोलीसँग टिमो वेर्नर, थियागो सिल्भा, क्रिस्टियन पुलिसिस, ओलिभर जिरुउड, हाकिमी जियाच र कलुम हड्सन ओडोइ पनि टोलीमा रहेका छन् ।

यता, प्रिमियर लिगको उपाधिको संघारमा रहेको सिटी पनि चेल्सीलाई पराजित गर्दै फाइनलमा पुग्ने लक्ष्यमा हुनेछ । टोलीसँग चोटका कारण सर्जियो अगुइरो नरहेपनि फिल फोडेन, गाब्रियल जेसस, रियाद महारेज, केभिन डि ब्रुयन, इल्केए गुन्डोगान, रोड्री, एमेरिक लापोर्टा, रुवेन डियास, केल वाल्कर र गोलरक्षक इडर्सन मोराएस रहेका छन् ।

यि दुई टोलीबीचको पछिल्लो २९ खेलको नतिजामा सिटी १६ खेलमा विजयी भएको छ । ९ खेल चेल्सीले आफ्नो पक्षमा पार्दा ४ खेल बराबरीमा सकिएको छ । यि दुई टोलीको पछिल्लो भेटमा सिटी ३–१ ले विजयी भएको थियो । त्यसअघि चेल्सीले २–१ को जित निकालेको थियो ।

चेल्सीले सेफिल्ड युनाइटेडलाई तथा सिटीले एभर्टनलाई समान २–० ले पराजित गर्दै सेमिफाइनलमा स्थान बनाएको थियो । अर्काे सेमिफाइनलमा आइतबार राति लेस्टर सिटी र साउथह्याम्टनबीच प्रतिस्पर्धा हुदैछ । लेस्टरले म्यानचेस्टर युनाइटेडलाई ३–१ ले तथा साउथह्याम्टनले बर्नमाउथलाई ३–० ले पराजित गर्दै सेमिफाइनलमा स्थान बनाएको थियो ।