काठमाडौं (हाम्रो खेलकुद) – ललितपुर सिटी एफसी र चितवन एफसीले खुकुरी नेपाल सुपर लिग (एनएसएल) मा १–१ गोलको बराबरी खेल्दै अंक बाँडेका छन् ।

ललितपुरका लागि कमल श्रेष्ठले गोल गर्दा चितवनका अमित तामाङले पेनाल्टीमार्फत बराबरी गोल फर्काए । त्रिपुरेश्वरस्थित दशरथ रंगशालामा सोमबार भएको खेलको १०औं मिनेटमा नविन लामाको पासमा बिमल रानाले पेनाल्टी बक्समा प्रहार गर्न ढिलाई गर्दा सिमन्त थापाले क्लियर गर्दै चितवनको खतरा टारे ।

त्यसमै कमल श्रेष्ठको कर्नरमा पाल्साङ लामाको फ्रि हेडर पोस्ट नजिकैबाट बाहिरिदा ललितपुर सिटी एफसी अग्रता लिनबाट चुक्यो । १९औं मिनेटमा कमल श्रेष्ठको कर्नरमा निरज बस्नेतलाई गोरान जर्काेभिचले फल गरेपछि रेफ्री प्रकाश नाथ श्रेष्ठले ललितपुरलाई पेनाल्टी प्रदान गरेको थियो । २१औं मिनेटमा चिवन एफसीका गोलरक्षक विशाल सुनारले दोहोरो बचाउ गर्दै चितवनको खतरा टारे ।

विशालले अन्जन विष्टको पेनाल्टी र रिवाउन्डका बिमल रानाको प्रहारलाई बचाएका थिए । ३५औं मिनेटमा गोरान जर्काेभिचको पासमा कप्तान भरत खवासको पेनाल्टी बक्सबाहिरको सशक्त प्रहार पोस्ट माथिबाट थोरै बाहिरिदा चितवन अग्रता लिनबाट चुक्यो । ४०औं मिनेटमा विमल रानाको हेडरलाई गोलरक्षक विशाल सुनारले डाइभ दिदै नियन्त्रणमा लिए । ४१औं मिनेटमा अन्जन विष्टको क्रस पासमा नुरलान जाहिदको हेडरले पोस्टको दिशा लिन सकेन ।

४९औं मिनेटमा कमल श्रेयठको गोलबाट ललितपुर सिटी एफसीले अग्रता लियो । ४९औं मिनेटमा मैदानको दाया भागबाट गरेको क्रस प्रहार दोस्रो बारको टप कर्नरमा गोल हुदा गोलरक्षक विशाल सुनारले रोक्ने प्रयास गरेपनि सफल भएन । ५४औं मिनेटमा नविन लामाको पासमा विमल रानाको प्रयासलाई गोलरक्षक विशाल सुनारले दोहोरो बचाउ गर्दा ललितपुर अग्रता दोब्बर पार्नबाट चुक्यो ।

६१औं मिनेटमा गोरान जर्काेभिचको पासमा कप्तान भरत खवासले सुवर्ण अवसर पाएपनि सदुपयोग हुन नसक्दा चितवन बराबरीबाट चुक्यो । ६५औं मिनेटमा नुरलान जाहिदको प्रहार क्रसबारमा लागेर फर्कदा ललितपुर अग्रता दोब्बर पार्नबाट चुक्यो । ६८औं मिनेटमा कप्तान अन्जन विष्टको प्रहारलाई गोलरक्षक विशाल सुनारले पञ्च गर्दै बचाए ।

८८औं मिनेटमा एरिक विष्टको प्रहारलाई गोलरक्षक विशालले पञ्च गर्दै बचाए । ९०औं मिनेटमा एरिक विष्टले अमित तामाङले पेनाल्टीमा गोल गर्दै चितवनलाई हारबाट जोगाए । अमित तामाङको प्रहारलाई पेनाल्टी बक्समा विनोद गुरुङले ह्यान्ड गरेपछि चितवनले पेनाल्टी पाएको थियो । जसलाई अमितले चुकाएन् ।

ललितपुरका विनोद गुरुङ इमर्जिङ प्लेयर अफ दि म्याच चुनिए । उनले १० हजार रुपैयाँ हात पारे । एफसी चितवनका विशाल सुनार प्लेयर अफ दि म्याच चुनिए । उनले २५ हजार रुपैयाँ हात पारे ।

बराबरी पछि ललितपुरले दुई खेलबाट १ अंक जोडेको छ । चितवनले १ अंक जोडेको छ । लिगमा मंगलबार धनगढी एफसी र काठमाडौं रेजर्सबीच साँझ ५ः३० बजे प्रतिस्पर्धा हुनेछ ।

नेपाल स्पोर्टस म्यानेजमेन्टले आयोजना तथा अखिल नेपाल फुटबल संघको प्राविधिक सहयोगमा हुने एनएसएलमा ७ शहरका ७ टोलीको सहभागिता रहेको छ । राउण्ड रोबिनको आधारमा हुने लिग १ जेठसम्म सञ्चालन हुनेछ । एनएसएलमा विराटनगर सिटी फुटबल क्लब, काठमाडौं रेजर्स फुटबल क्लब, ललितपुर सिटी फुटबल क्लब, एफसी चितवन, धनगढी एफसी, पोखरा थन्डर्स र बुटवल लुम्बिनी एफसी रहेका छन् ।

प्रतियोगिताको विजेताले ३५ लाख रुपैयाँ प्राप्त गर्नेछन् । उपविजेताले १५ लाख रुपैयाँ हात पार्नेछन् । व्यक्तिगत विधातर्फका उत्कृष्टले जनही १ लाख तथा उत्कृष्ट युवा खेलाडीले पनि १ लाख रुपैया हात पार्नेछन् । हरेक खेलको म्यान अफ दि म्याचले २५ हजार रुपैयाँ पाउने छन् ।