काठमाडौं (हाम्रो खेलकुद)– राष्ट्रिय महिला टोली तथा त्रिभुवन आर्मी फुटबल क्लबकी मिडफिल्डर दीपा राईको खुट्टाको बिहीबार शल्यक्रिया भएको छ । दायाँ खुट्टाको गोलीगाँठा नजिक हड्डी पलाएर दुख्न थालेपछि बिएण्डबी अस्पतालमा शल्यक्रिया गरिएको हो ।

डा. अमित जोशीको नेतृत्वको टोलीले शल्यक्रिया गरेको थियो । डक्टरले मैदान फर्कन ३ देखि ४ महिना लाग्ने बताएको दीपाले बताईन् । ‘पाँच छ महिनादेखि हड्डी पलाएर अप्ठेरो भएको थियो । राष्ट्रिय लिगपछि झन गाह्रो हुन थाल्यो ,’ उनले भनिन्, ‘त्यसले डक्टरको सल्लाह अनुसार शल्यक्रिया गरेर त्यो हड्डी निकालिएको छ ।’

आर्मी क्लबका व्यवस्थापक विकास मल्लले दीपा क्लब र राष्ट्रिय टोलीको महत्वपूर्ण खेलाडी रहँदै आएको बताए । उनी हाम्रो टोलीको मुख्य खेलाडी मध्ये एक हुन्, उनले भने, हामीले उनलाई टोलीको मेरुदण्डका रुपमा लिन्छौं ।

उदयपुर जिल्ला बेलका नगरपालिका ४ की दीपा २०६९ मा आर्मीमा आबद्ध भएकी थिइन् । आर्मीमा आबद्ध हुनुअघि उनले जिल्लाको टोलीबा एनसेल कप लगायत खेलेकी थिइन् । सन् २०१४ मा तेस्रो महिला साफ च्याम्पियनसिपमा उनले राष्ट्रिय टोलीबाट डेब्यू गरेकी थिइन् । ३४ क्याप जितिसकेकी उनको नाममा १ गोल रहेको छ ।