एजेन्सी – युरोपा लिगको सेमिफाइनलको पहिलो लेगमा स्पेनिस क्लब भिल्लारियलले इंग्लिस क्लब आर्सनललाई हराएको छ । घरेलु मैदानमा बिहीबार राति भएको खेलमा भिल्लारियलले आर्सनलमाथि २–१ को जित दर्ता गरेको हो ।

भिल्लारियलको जितमा म्यानुयल ट्रिगुइरस र राहुल अल्विओलले गोल गर्दा आर्सनलका निकोलस पेपेले एक गोल फर्काए । भिल्लारियलले खेलको पाँचौ मिनेटमा म्यानुयल ट्रिगुइरसको गोलबाट अग्रता लिएको थियो । उनले स्यामुयल चुकवुजीको पासमा गोल गरेका थिए ।

२९औं मिनेटमा राहुल अल्विओलले जेरार्ड मोरेनोको पासमा गोल गर्दै भिल्लारियललाई पहिलो हाफमा २–० को अग्रता दिलाए । २–० ले पछि परेको आर्सनल ५७औं मिनेटमा १० खेलाडीमा समेटियो । ड्यानियल पारेजोमाथि फल गरेपछि रेफ्रीले सेवालोसलाई दोहोरो पहेँलो बार्ड देखाउँदै मैदान बाहिर पठाए ।

१० खेलाडीमा समेटिएपनि ७३औं मिनेटमा पेनाल्टीमा गोल गर्दै आर्सनललाई खेलमा फर्कने संकेत दिए । बुकायो साकामाथि म्यानुयल ट्रिगुइरसले फल गरेपछि प्राप्त पेनाल्टीलाई निकोलस पेपेले सदुपयोग गरेका थिए । ८०औं मिनेटमा भिल्लारियल पनि १० खेलाडीमा समेटियो ।

टिनी कापोइ दोहोरो पहेँलो कार्ड खादै मैदानबाट बाहिरिए । त्यसपछि थप गोल निस्कन नसक्दा भिल्लारियल विजयी हुन सफल भयो । दोस्रो लेगको खेल आर्सनलको मैदानमा ७ मेमा हुनेछ ।