एजेन्सी – मुख्य खेलाडीलाई चोटका कारण निकै समस्यामा रहेको स्पेनिस च्याम्पियन रियल म्याड्रिडलाई अर्को समस्या आइपरेको छ । मांशपेसीको चोट बोकेपछि डिफेन्डर ड्यानी कार्भाजल यो सिजन फेरी नखेल्ने अवस्थामा पुगेका छन् ।

च्याम्पियन्स लिग अन्तर्गत चेल्सीविरुद्ध सेमिफाइनलको पहिलो लेगमा कार्भाजलले चोट बोकेका हुन् । उक्त खेल १-१ को बराबरीमा सकिएको थियो । मंगलबार खेलका दौरान चोट बोकेका उनको विहीबार विस्तृत परिक्षण गरिएको थियो । परिक्षणका अनुसार उनी कम्तिमा ३ साता मैदानबाहिर रहनेछन् । यसको मतलब उनले अब यस सिजन फेरी खेल्ने छैनन् ।

रियलले लिगका सम्पूर्ण खेल ३ साताभित्र खेल्दैछ । यदि क्लबले च्याम्पियन्स लिग फाइनलमा स्थान बनाएको खण्डमा भने उनले खेल्न सक्ने सम्भावना रहनेछ । तर लामो समय मैदानबाहिर रहेको अवस्थामा सिधै फाइनलमा उनलाई जोखिम लिनेबारे जिदानले निर्णय लिनुपर्ने हुन्छ ।

यसैपनि टोलीमा चोटका कारण अन्य खेलाडी पनि बाहिर रहेका छन् । कार्भाजल लामो समय घाइते हुँदा लुकास भाज्केजले उक्त पोजिसनमा खेलेका थिए । उनले त्यस पोजिसनमा उत्कृष्ट प्रदर्शन पनि गरे । तर एल क्लासिकोमा घुँडाको चोट बोकेपछि उनी अर्को सिजन मात्र फर्कने भएका छन् ।

अब जिदानले अल्भारो ओड्रीओजोलालाई प्रयोग गर्नुपर्ने देखिन्छ । अर्को रोजाइका रुपमा रहेका नाचो फर्नान्डेज सेन्टर ब्याक खेलिरहेका छन् । सर्जियो रामोस ठिक भएर फर्किएको खण्डमा भने नाचोले खेल्ने सम्भावना रहनेछ ।