एजेन्सी – दोस्रो श्रेणीको होल्सटेइन केइललाई हराउँदै जर्मन बुन्डेसलिगा क्लब बोरुसिया डर्टमुन्ड डिएफवी पोकल (जर्मन कप) को फाइनलमा प्रवेश गरेको छ ।

घरेलु मैदान सिग्नल इडुना पार्कमा शनिबार राति भएको खेलमा डर्टमुन्डले होल्सटेइन केइलमाथि ५–० को सानदार जित निकाल्दै उपाधिनजिक पुगेको हो । डर्टमुन्डको फराकिलो जितमा जियोभानी रेनाले दुई तथा मार्काे रिउस, थोर्गन हाजार्ड र जुडे बेलिङघमले समान एक गोल गरे । सबै पाँच गोल पहिलो हाफमा सम्भव भएको थियो ।

एक पक्षीय बनेको खेलको १६औं मिनेटमा जियोभानी रेनाले जाडोन सान्चोको पासमा गोल गर्दै घरेलु टोलीलाई अघि बढाएका थिए । २३औं मिनेटा रेनाले व्यक्तिगत दोस्रो गोल गर्दै डर्टमुन्डको अग्रता दोब्बर पारे । २६औं मिनेटमा कप्तान मार्काे रिउसले इम्री क्यानको पासमा गोल गर्दै डर्टमुन्डलाई सहजै जिततर्फ अघि बढाए । ३२औं मिनेटमा थोर्गन हाजार्डले गोल गरेपछि डर्टमुन्ड खेलमा ४–० ले अघि बढ्यो ।

४१औं मिनेटमा सान्चोको पासमा जुडे बेलिङघमले गोल गर्दै डर्टमुन्डलाई पहिलो हाफमा ५–० को फराकिलो अग्रता दिलाए । दोस्रो हाफमा गाल निस्कन नसक्दा पहिलो हाफको पाँच गोल नै डर्टमुन्डको जितमा पर्याप्त बन्यो । दोस्रो श्रेणीको होल्सटेइनले डर्टमुन्डविरुद्ध केही अवसर पाएपनि चुकाउँदा फराकिलो हार बेहोर्न पुग्यो ।

अब डर्टमुन्डले उपाधिका लागि आरवी लाइप्जिगको सामना गर्नेछ । लाइप्जिगले वेर्डर ब्रेमेनललाई अतिरिक्त समयमा २–१ ले पराजित गर्दै फाइनलमा स्थान बनाएको थियो । फाइनल १४ मेमा हुनेछ ।