एजेन्सी – इंग्लिस प्रिमियर लिगमा लन्डन क्लब आर्सनलसँग पराजित हुदै वेस्ट ब्रोम रेलिगेसनमा परेको छ । आर्सनलको घरेलु मैदान इमिरेट्स स्टेडियममा आइतबार राति भएको खेलमा ३–१ को हार बेहारेसँगै वेस्ट ब्रोम ३ खेल बाँकी छदै रेलिगेसनमा पर्ने दोस्रो टोली बनेको हो ।

यसअघि सेफिल्ड युनाइटेड रेलिगेसनमा परिसकेको छ । १९औं स्थानमा रहेको वेस्ट ब्रोमको ३५ खेलबाट २६ अंक छ । रेलिगेसन जोगाउन वेस्ट ब्रोमलाई बाँकी तीन खेलमा जित निकालेपनि पर्याप्त हुनेछैन । रेलिगेसन जोनभन्दा माथि रहेको बर्नलेको ३४ खेलबाट ३६ अंक छ ।

आर्सनलको जितमा इमिल स्मिथ रोवी, निकोलस पेपे र विलियनले गोल गरे । वेस्ट ब्रोमका म्याथुस पेरेइराले एक गोल फर्काए । खेलको २९औं मिनेटमा इमिल स्मिथ रोवीको गोलबाट आर्सनलले अग्रता लिएको थियो ।

उनले बुकायो साकाको पासमा गोल गरेका थिए । ३५औ. मिनेटमा कलुम चेम्वर्ससको पासमा निकोलस पेपेले गोल गर्दै आर्सनललाई पहिलो हाफमा २–० को अग्रता दिलाए ।

६७औं मिनेटमा म्याथुस पेरेइराले कोनोर टाउनसेन्डको पासमा गोल गर्दै खेललाई २–१ को अवस्थामा ल्याए । तर, खेलको अन्तिम समयमा विलियनले गोल गर्दै आर्सनललाई सहज जित दिलाए । जितपछि आर्सनल ३५ खेलबाट ५२ अंक जोडेर नवौं स्थानमा उक्लिएको छ ।

अन्य नतिजा
वल्भ्सविरुद्ध ब्राइटन (२–१), एस्टन भिल्लाविरुद्ध म्यानचेस्टर युनाइटेड (१–३), वेस्टह्यामविरुद्ध एभर्टन (०–१)