एजेन्सी – फ्रान्सेली लिग अन्तर्गत यसै साता भएको खेलमा साविक विजेता पेरिस सेन्ट जर्मेन (पिएसजी) रेन्नेसको मैदानमा १-१ को बराबरीमा रोकियो । उपाधि होडमा रहेको लिलले शुक्रबार नै लेन्समाथि जित हासिल गरेकोले अब शीर्षस्थानमा ३ अंकको अग्रता भएको छ ।

युवा फरवार्ड किलियन एमबाप्पे चोटका कारण पछिल्ला केहि खेलमा उपस्थित रहेका छैनन् । पूर्ण रुपमा फिट नरहेका उनले म्यानचेस्टर सिटीविरुद्ध च्याम्पियन्स लिगको पहिलो लेगमा अपेक्षित प्रदर्शन गर्न सकेनन् । दोस्रो लेगमा त उनी मैदानमा नै उत्रेनन् । गोलका लागि संघर्ष गरेको पिएसजी दुवै खेल हार्दै फाइनलमा पुग्न सकेन ।

यता च्याम्पियन्स लिगबाट बाहिरिएको पिडा बिर्सन नपाउँदै पिएसजीले लिग उपाधिबाट पनि बन्चित हुनुपर्ने अवस्था आएको छ । रेन्नेसविरुद्ध १-१ को बराबरी खेलेसँगै लिल अब उपाधिबाट मात्र ४ अंक टाढा छ । लिगको २ खेल बाँकी रहेको अवस्थामा अब पिएसजीको हातबाट उपाधि फुस्किएको छ ।

पिएसजीको अबको ध्यान फ्रेन्च कपमा हुनेछ । सेमिफाइनलमा पेरिस क्लबले मोन्टपेलिएरको सामना गर्दैछ । उक्त खेलमा भने एमबाप्पे उपलब्ध हुने सम्भावना छ । यस सिजनको सफलताले पनि एमबाप्पेको भविष्यमा ठूलो भूमिका खेल्नेछ । त्यसैले पनि क्लब अब सम्भव भएसम्म खेल गुमाउन चाहदैन ।

पिएसजीले यसै साता नेयमारसँग नयाँ सम्झौता नवीकरण गरेको छ । ब्राजिलियन फरवार्ड अब सन् २०२५ सम्म फ्रान्सेली क्लबमा नै रहनेछन् । एमबाप्पेको सम्झौता अर्को सिजनसम्म रहेपनि नवीकरण भने हुन सकेको छैन । स्रोतका अनुसार दुवै पक्ष समझदारीमा आउन सकेका छैनन् ।

एमबाप्पे बिना कमजोर देखिएको पिएसजीले अब उनलाई लामो समय क्लबमा राख्ने प्रयास पक्कै गर्नेछ । तर रियल म्याड्रिडले लामो समयदेखि नजर राखिरहेको र एमबाप्पे आफैं पनि रियल जान इच्छुक रहेकाले पिएसजीलाई सुखद खबर भने नआउन सक्छ ।