एजेन्सी – कोरोना भाइरस संक्रमणका कारण विश्व फुटबलमा निकै असर परेको छ । केहि समय ठप्प रहेको विश्व खेलकुद बिस्तारै स्वास्थ्य मापदण्ड पालना गर्दै सुचारु भएका छन् । तर यसका बाबजुद संक्रमणको समस्या भने कायम नै छ ।

अर्जेन्टिनाको शीर्ष डिभिजन क्लब रिभर प्लेटले बुधबार कोरोना संक्रमणका कारण ठूलो समस्या भोग्नु पर्यो । क्लबका खेलाडीमा कोरोना संक्रमण फैलिएपछि खेलाडी र प्रशिक्षक नै संक्रमित भए । दक्षिण अमेरिकाको शीर्ष क्लब प्रतियोगिता कोपा लिबर्टाडोरेसको खेल खेल्नुपर्ने अवस्थामा क्लबले खेल स्थगित गर्न आग्रह गर्यो, तर आयोजकले जसरि पनि खेल्नुपर्ने बतायो ।

रिभर प्लेटको टोलीमा रहेका २० भन्दा बढी खेलाडी संक्रमित थिए जसमा दर्ता भएका ४ गोलरक्षक पनि थिए । आयोजकले जसरी पनि खेल्नुपर्ने बताएपछि रिभर प्लेटले घाइते मिडफिल्डर एन्जो पेरेजलाई गोलरक्षकको भूमिकामा उतार्ने निर्णय लियो । पेरेजसहित जम्मा ११ खेलाडी मात्र उपलब्ध रहेकाले वैकल्पिक खेलाडी पनि टोलीसँग थिएन । पेरेजले ह्यामस्त्ट्रीङ चोटका बाबजुद पूरा समय खेल्नुपरेको थियो ।

🔝 An unforgettable night for @RiverPlate and Enzo Pérez!

🔴⚪🧤 The midfielder put on the gloves and earned #BestOfTheMatch honors as #River topped @SantaFe. pic.twitter.com/z8SghkbYFd

— CONMEBOL Libertadores (@TheLibertadores) May 20, 2021

बुधबार सान्ता फेविरुद्ध खेल टोलीले २-१ ले जित्यो । र खेलमा प्लेयर अफ द म्याच घोषित भए उनै एन्जो पेरेज । खेलमा रिभर प्लेटले तेस्रो मिनेटमा फाबिरिसियो एन्जिलेरी र छैटौं मिनेटमा जुलियन अल्भारेजको गोलमा अग्रता लिएको थियो । दोस्रो हाफको ७३ औं मिनेटमा पेरेजले गोल खाएका थिए । केभिन ओसोरियोले पेनाल्टी क्षेत्रभित्र भिडभाड हुँदा गरेको फितलो प्रहार गोल भएको थियो ।

यस खेलमा उपस्थित नरहेको भए रिभर प्लेटले ३ अंक गुमाउनुपर्ने हुन्थ्यो । तर जितसँगै टोलीले शीर्ष स्थानमा अग्रता कायम राख्दै अर्को चरणमा छनोट हुने सम्भावना बलियो पारेको छ । रिभर प्लेटको ५ खेलमा ९ अंक हुँदा फ्लुमिनेन्सेको ८ तथा एटलेटिको जुनियरको ६ अंक छ । खेलमा पराजित सान्ता फे भने २ अंकसहित पुछारमा छ ।