एजेन्सी – इटालियन क्लब युभेन्टसले इटालियन सिरी ए अन्तर्गत अन्तिम चरणको खेलमा सुपरस्टार फरवार्ड क्रिस्टियानो रोनाल्डोलाई बेन्चमा राखेको छ ।

बोलोग्नाविरुद्ध प्रशिक्षक आन्द्रीए पिर्लोले आक्रमणमा अल्भारो मोराटा र पाउलो डिबालालाई खेलाउँदै रोनाल्डोलाई वैकल्पिकमा राखेका हुन् । रोनाल्डो युभेन्टस आएयता बेन्चमा रहनु परेको यो पाँचौ अवसर हो । युभेन्टसले आजको खेलमा बोलोग्नालाई पराजित गरेर अन्य खेल आफू अनुकुल नतिजा आएमात्र च्याम्पियन्स लिग खेल्नेछ । युभेन्टस हाल अंक तालिकाको पाँचौ स्थानमा छ ।

बोलोग्नाविरुद्ध पिरलोले फेडेरिको किएजा र डेजान कुलुसेभ्सकीलाई विंगमा खेलाएका छन् । मिडफिल्डमा एड्रीएन राबीओट र ड्यानिलो रहेका छन् । डिफेन्समा एलेक्स स्यान्ड्रो र जुआन क्वाडराडो विंग ब्याकमा रहँदा कप्तान जिओर्जियो किएलिनी र म्याथिस डे लिग्ट सेन्टर डिफेन्समा छन् । गोलरक्षकमा वोजचिएक सेचेज्नी छन् ।

बोलोग्नाको मैदानमा उत्रँदा युभेन्टसलाई जित निकाल्नै पर्ने दवाव छ । जित निकाल्न नसकेको खण्डमा युभेन्टस शीर्ष चारबाट बाहिर रहँदै युरोपा लिगमा खुम्चिनेछ । शीर्ष चारको दौडमा रहेको एटलान्टा र मिलानको खेल तथा नेपोलीले हेलास भेरोनाको नतिजाले पनि युभेन्टसको शीर्ष चारको यात्राको बाटो देखाउनेछ ।

बोलोग्नालाई पराजित गर्न सकेको अवस्थामा युभेन्टसको शीर्ष चारको सम्भावना रहनेछ । यस्तो अवस्थामा एटलान्टा र मिलानले बराबरी खेल्दा नेपोलीले बराबरी या हारको नतिजा निकाल्दा युभेन्टस शीर्ष चारमा पुग्नेछ ।

मिलान र नेपोली विजयी भएमा युभेन्टसले एटलान्टासँग अंक बराबरी गरेपनि हेडटु हेडमा युभेन्टस बाहिरिनेछ । युभेन्टसले मिलान र नेपोलीको बराबरी या हार चाहेको छ । बराबरी या हारले युभेन्टस शीर्ष चारबाट बाहिरिनेछ ।

यो पनि : चेल्सी र लिभरपुल च्याम्पियन्स लिगमा, लेस्टर पाँचौ