एजेन्सी – अन्तर्राष्ट्रिय मैत्रीपुर्ण खेलमा इटालीले सानदार जित दर्ता गरेको छ । घरेलु मैदानमा इटालीले चेक रिपब्लिकमाथि ४–० को फराकिलो जित निकालेको हो ।

इटालीको फराकिलो जितमा सिरो इमोविले, निकोलो बरेल्ला, लोरेन्जो इन्सिग्ने र डोमिनिको बेरारडीले गोल गरे । पहिलो र दोस्रो हाफमा समान दुई गोल निस्किएको थियो । खेलको २३औं मिनेटमा सिरो इमोविलेको गोलबाट इटालीले अग्रता बनाएको थियो । ४२औं मिनेटमा निकोलो बरेल्लाले गोल गर्दै इटालीलाई पहिलो हाफमा २–० ले अघि बढाए ।

६६औं मिनेटमा लोरेन्जो इन्सिग्नेले गोल गर्दै इटालीलाई फराकिलो जिततर्फ अग्रसर गराए । ७३औं मिनेटमा डोमिनिको बेरारडीले गोल गर्दै इटालीको फराकिलो जित पक्का गरे । घरेलु टोलीविरुद्ध चेक रिपब्लिकले कुनै पनि समय गतिलो पोस्ट आक्रमण बुन्न सकेन । काउन्टर अट्याकमा केही प्रयास गरेपनि चेकले इटालीको बलियो रक्षापङ्ति तोड्न सकेन ।

युरोकपको तयारीका लागि राष्ट्रहरुले अभ्यास खेलिरहेका छन् । अब समूह ‘ए’ मा रहेको इटालीले १२ जुनमा टर्कीसँग युरो कपमा प्रतिस्पर्धा गर्दैछ । त्यसपछि १७ जुनमा स्वीट्जरल्यान्ड र २० जुनमा वेल्ससँग खेल्नेछ ।

यस्तै चेक रिपब्लिकले ९ जुनमा अल्वानियासँग मैत्रीपुर्ण खेल खेलेपछि युरोकपमा होमिनेछ । चेक युरोकपमा समूह ‘डी’ मा रहेको छ । चेक रहेको समूहमा स्कटल्यान्ड क्रोएसिया र इंग्ल्यान्डर रहेका छन् । यस्तै अर्काे मैत्रीपुर्ण खेलमा आइसल्यान्डले फारोइ आइल्यान्डलाई १–० ले पराजित गरेको छ । ७०औं मिनेटमा मिकाइल एन्डरसनले गरेको गोल नै आइसल्यान्डको जितमा निर्णायक बन्यो ।

अन्य नतिजा
फिनल्यान्डविरुद्ध इस्टोनिया (०–१), लात्भियाविरुद्ध लिथुआनिया (३–१), माल्टाविरुद्ध कोसोभो (१–२), नर्थ म्यासेडोनियाविरुद्ध काजकस्तान (४–०), स्पेनविरुद्ध पोर्चुगल (०–०) र हंगेरीविरुद्ध साइप्रस (१–०)