एजेन्सी – ब्राजिलियन लेफ्ट ब्याक मार्सेलोले क्लब छाड्ने चर्चाकाबीच उनी अन्तत स्पेनिस क्लब रियल म्याड्रिडमै रहने पक्का भएको छ । उनी आफ्नो सम्झौता अवधिसम्म नै रियलमा रहने भएका हुन् ।

मार्सेलोको सम्झौता २०२२ जुनको अन्त्यसम्म रहेको छ । विश्व फुटबलकै उत्कृष्टमध्येको लेफ्टब्याक मार्सेलोले यो सिजन क्लब छाड्ने अनेक अड्कल बाजी चलेको थियो । तर उनी नियमित रुपमा क्लबका निर्देशकहरुसँग नियमित सम्पर्कमै रहेका थिए । सान्टियागो बर्नबेउमा मार्सेलोको प्रभावकारी सम्वन्ध रहेको छ । सोही कारण पनि उनले आफ्नो सम्झौता अवधिसम्म क्लबमा रहनको लागि आग्रह गरेका थिए ।

प्रशिक्षक कार्लाे एन्सेलोटीका कारण पनि उनी रियलमै रहने भएका हुन् । प्रशिक्षक एन्सेलोटीको प्रशिक्षणमा मार्सेलोले २०१४–१५ को सिजनमा ५३ खेलमा अवसर पाएका थिए । पछिल्लो समय चोट र कमजोर प्रदर्शनका कारण अहिले उनको स्थानमा फर्लान्ड मेन्डीसँगै क्यास्टिलाका मिगेल गुइटेरेज आएका छन् ।

यद्दपि रियल अझै पनि मार्सेलोलाई क्लबमा उचित स्थान दिने पक्षमा छ । उनी अब टोलीका कप्तान समेत रहनेछन् । नियमित कप्तान सर्जियो रामोसले क्लब छाडेपछि उनले क्लबको कप्तानको जिम्मेवारी पाएका हुन् । यसैले क्लबले आफ्नो करार समाप्त गर्न चाहने खेलाडीको इच्छालाई सम्मान गर्नेछ ।

३३ वर्षीय मार्सेलो सन् २००६ मा ब्राजिलियन क्लब फ्लुमिनेन्सबाट रियल म्याड्रिडमा अनुबन्ध भएका थिए । अर्का ब्राजिलियन रोबर्टाे कार्लाेसले १५ वर्षको रियल बसाई छाडेपछि उनी रियलमा आएका थिए । अहिले उनले कार्लोसले भन्दा बढी खेल र ट्रफी जितेका छन् ।