एजेन्सी – युरोपेली च्याम्पियनसिपको समूह चरणको दोस्रो खेलमा उपाधि दावेदार इटालीले आज राति स्वीट्जरल्यान्डको सामना गर्दैछ । खेल इटालीको घरेलु मैदान रोममा नेपाली समयअनुसार राति १२:४५ बजे हुनेछ ।

पहिलो खेलमा टर्कीमाथि ३–० को सहज जित हात पारेको इटाली लगातार दोस्रो जितको खोजीमा रहँदा स्वीट्जरल्यान्डलाई पराजित गर्ने लक्ष्यमा हुनेछ । स्वीट्जरल्यान्डलाई पराजित गर्न सके इटालीले समूह चरण पार गर्ने लगभग पक्का जस्तै रहनेछ । त्यसअघि टर्की र वेल्सको नतिजाले पनि इटालीको समिकरणमा फरक पार्न सक्नेछ ।

इटालीसँग सिरो इमोविले, लोरेन्जो इन्सिग्ने, डोमिनिको बेरारडी, निकोलो बरेल्ला, जर्गिन्हो, म्यानुयल लोकाटेली, जर्जियो चिलियानी, लियान्द्रो बोनुची र गोलरक्षक जियानलुजी डोन्नररुम्माको साथ रहेको छ ।

पछिल्लो ९ खेलमा शतप्रतिशत जित निकालेको इटालीले कुनैपनि गोल खाएको छैन । पछिल्लो २८ खेलमा अपराजित इटाली सोही अपराजित यात्रालाई निरन्तरता दिने लक्ष्यमा रहँदा स्वीट्जरल्यान्ड समूहमा पहिलो जितको खोजीमा हुनेछ । वेल्सविरुद्ध सुरुवाती अग्रता लिएरपनि जोगाउन नसक्दा स्वीस टोली १–१ गोलको बराबरीमा रोकिएको थियो ।

समूह चरण पार गर्न स्वीस टोलीलाई जितको खाँचो छ । बराबरी या हारले टोलीको अघिल्लो चरण पुग्ने सम्भावना झिनो बन्नेछ । टोलीसँग ब्रिल इम्वोलो, ह्यारिस सेफेरोभिच, जद्रान शाकिरी, ग्रानिट झाँका, केभिन एमबाबु, म्यानुयल एकान्जी र गोलरक्षक यान सोम्मेरको साथ रहेको छ ।

यो समूह ‘ए’ मा पहिलो चरणको खेल सकिदा इटाली ३ अंक जोडेर शीर्षस्थानमा रहेको छ । समान १ अंक जोडेको स्वीस र वेल्स दोस्रो र तेस्रो स्थानमा रहँदा अंकविहीन टर्की पुछारमा छ ।