एजेन्सी – युरोपेली च्याम्पियनसिप अन्तर्गत समूह सी मा लगातार दोस्रो जित दर्ता गर्दै नेदरल्यान्ड्स अन्तिम १६ मा प्रवेश गरेको छ । बिहीबार घरेलु मैदानमा अष्ट्रियामाथि २-० को जित दर्ता गर्दै डच टोली १३ वर्षपछि युरोको नकआउट चरणमा पुगेको हो । यसअघि टोली सन् २००८ को युरोमा समूह चरण पार गर्न सफल रहेको थियो ।

घरेलु टोली नेदरल्यान्ड्सले खेलको ११ औं मिनेटमा मेम्फिस डिपाएको पेनाल्टी गोलमा अग्रता लिएको थियो । अष्ट्रियाका कप्तान डेविड अलाबाले पेनाल्टी क्षेत्रभित्र डेन्जेल डम्फ्राईजलाई लडाएको भिडियो असिस्टेन्ट रेफ्रीले देखेपछि रेफ्रीले पेनाल्टी दिएका थिए । गोलरक्षक बाक्म्यानले डिपाएको प्रहारको दिशा ठम्याएपनि रोक्न भने सकेनन् ।

खेलको ४० औं मिनेटमा डिपाएले नै अग्रता दोब्बर पार्ने सुवर्ण अवसर खेर फाले । वोट वेघर्स्टले पेनाल्टी क्षेत्रभित्र लामो पासलाई नियन्त्रण गर्दै दिएको पासलाई डिपाएले पोस्टको दिशा दिन सकेनन् । गोलरक्षक र डिफेन्डर दुवै वेघर्स्टको पासमा झुक्किंदा डिपाएले लगभग खाली पोस्टमा गोल गर्न चुकेका थिए । त्यसअघि अष्ट्रियाका मार्टिन हिन्टरेगरको प्रहार बाहिरिंदा अष्ट्रिया खेलमा फर्कन सकेन ।

६७ औं मिनेटमा नेदरल्यान्ड्सले डम्फ्राइजको गोलमा अग्रता दोब्बर पार्यो । वैकल्पिक खेलाडी डनि मालेनले अफसाइड ट्रयाप बिट गर्दै पेनाल्टी क्षेत्र भित्रबाट दिएको पासलाई अनमार्क रहेका डम्फ्राइजले पहिलो टचमा नै गोल गरेका थिए ।

यस जितसँगै नेदरल्यान्ड्सको २ खेलमा ६ अंक भएको छ । यसै समूहमा रहेको युक्रेन र अष्ट्रियाको ३-३ अंक छ । नर्थ म्यासेडोनिया भने अंकविहिन रहेको छ । अन्तिम चरणमा युक्रेन र अष्ट्रिया तथा नेदरल्यान्ड्स र नर्थ म्यासेडोनिया भिड्नेछन् ।

त्यसअघि दिनको दोस्रो खेलमा बेल्जियमले एक गोलले पछि परेको अवस्थालाई उल्टाउँदै समूह बी को खेलमा डेनमार्कलाई पराजित गरेको थियो । दोस्रो हाफमा मैदान प्रवेश गरेका केभिन डे ब्रुएनको प्रभावशाली प्रदर्शनमा बेल्जियमले २-१ को जित दर्ता गर्दै अन्तिम १६ मा स्थान पक्का गर्यो ।

डेनमार्कले खेलको दोस्रो मिनेटमा नै अग्रता लिँदै घरेलु समर्थकमाझ उत्साह छरेको थियो । बेल्जियमको डिफेन्समा कमजोरीको फाइदा उठाउँदै युसुफ पाउल्सेनले गोल गरेका थिए । उनले पिएर एमिल होएबिएरको पासलाई नियन्त्रणमा लिँदै पेनाल्टी क्षेत्रको ठिक भित्रबाट गरेको प्रहार गोलमा परिणत भएको थियो ।

बेल्जियमले पहिलो हाफमा गोलको केहि अवसर सिर्जना गरेपनि त्यसको सदुपयोग गर्न सकेन । डेनमार्कले बेल्जियमलाई बल पोसेसनमा रहंदा पनि निरन्तर दबाब दिँदा टोलीले गोल फर्काउन सकेको थिएन । तर दोस्रो हाफमा प्रशिक्षक रोबर्टो मार्टिनेजले मिडफिल्डर डे ब्रुएनलाई मैदान प्रवेश गराउँदै खेलको रुप नै बदले ।

डे ब्रुएनकै पासमा थोर्गन हाजार्डले ५५ औं मिनेटमा गोल गर्दै खेल बराबरीमा ल्याए । पेनाल्टी क्षेत्रभित्र डे ब्रुएनले संयमित रहेर डिफेन्स लाइन तोडेपछि दिएको पासलाई हाजार्डले गोल गरेका थिए । ७१ औं मिनेटमा डे ब्रुएनले सानदार गोल गर्दै टोलीलाई अग्रता दिलाए । उनले इडेन हाजार्डको पासमा पेनाल्टी क्षेत्र बाहिरबाट गोल गर्दै टोलीलाई अग्रता दिलाएका थिए ।

त्यसपछि दुवै टोलीले गोलको अवसर सिर्जना गरेपनि गोलरक्षक बाधक बने । डेनमार्कले ८७ औं मिनेटमा खेल बराबरी गर्न अवसर पाएपनि क्रसबार त्यसमा बाधक बन्यो । ८७ औं मिनेटमा मार्टिन ब्रेथवेटले स्कोभ ओल्सनको क्रसमा गरेको हेडरमा कोर्टुवा निरिह बनेपनि क्रसबारले बेल्जियमको अग्रता जोगायो ।

यस जितसँगै बेल्जियम समूह बीको २ खेलमा ६ अंक जोड्दै शीर्षस्थानमा पुगेको छ । बेल्जियमले नकआउट चरणमा पनि स्थान पक्का गरेको छ । समूहमा फिनल्यान्ड र रसियाको समान ३-३ अंक छ । डेनमार्क भने दुवै खेलमा पराजित हुँदै समूह चरणबाट नै बाहिरिने सम्भावना बढेको छ ।

त्यस्तै दिनको पहिलो खेलमा कप्तान एन्ड्रिय यार्माेलेन्कोले एक गोल र अर्काे गोलको लागि असिस्ट दिएपछि युक्रेनले युरोपेली च्याम्पियनसिपमा पहिलो जित दर्ता गरेको थियो । युक्रेनले पहिलोपटक युरो खेलिरहेको नर्थ म्यासेडोनियालाई २–१ ले पराजित गरेको हो ।

यो जितसँगै युक्रेनले समूह चरण पार गर्ने सम्भावना जीवितै राख्दा लगातार दोस्रो हार बेहोरेको नर्थ म्यासेडोनियाको समूह चरण पार गर्ने सम्भावना झिनो बनेको छ । युक्रेन पहिलो खेलमा नेदरल्यान्ड्ससँग ३–२ ले पराजित भएको थियो भने नर्थ म्यासेडोनियाले अष्ट्रियासँग ३–१ को हार बेहोरेको थियो । रोमानियास्थित एरिना नेसनल बुखारेस्टमा बिहीबार भएको खेलमा युक्रेनको जितमा यार्माेलेन्को र रोमन यारेमचुकले गोल गर्दा नर्थ म्यासेडोनियाका इज्ग्जान एलिओस्कीले एक गोल फर्काए ।

खेलको नवौं मिनेटमा रुस्लान मालिनोभ्स्कीको प्रहारलाई नर्थ म्यासेडोनियाका गोलरक्षक स्टोल डिमिट्रिभ्स्कीले बचाउदा युक्रेन अग्रता लिनबाट चुक्यो । लगत्तै मालिनोभ्स्कीको पासमा एन्ड्रिय यार्माेलेन्कोको प्रहारमा गोलरक्षक स्टोल नै बाधक बने । १७औं मिनेटमा इल्जिफ इल्मासले गोल गर्न अवसर खेर फाले । २४औं मिनेटमा यार्माेलेन्कोको प्रहारलाई गोलरक्षक डिमिट्रिभ्स्कीले उत्कृष्ट बचाउ गर्दै म्यासेडोनियाको खतरा टारे ।

२९औं मिनेटमा कप्तान यार्माेलेन्कोले गोल गर्दै युक्रेनलाई अग्रता दिलाए । एलेक्सान्डर काराभाइवको पासमा उनले सहजै फिनिस गरेका थिए । ३४औं मिनेटमा यार्माेलेन्कोले पासमा रोमन यारेमचुकले अफसाइड बिट ट्रयापमा गोल गर्दै युक्रेनको अग्रता दोब्बर पारे । ३९औं मिनेटमा कप्तान गोरान पाण्डभले गोल गरेपनि उनी अफसाइड ठहरिदा म्यासेडोनियाले गोल अन्तर घटाउन सकेन ।

४७औं मिनेटमा एरिजान एडेमीको प्रहारमा गोलरक्षक जर्ज बुस्चानले डाइभ दिदै क्लियर गर्दा म्यासेडोनिया निराश बन्यो । ५१औं मिनेटमा रुस्लान मालिनोभ्स्कीको फ्रिकिकलाई डिमिट्रिभ्स्कीले डाइभ दिँदै बचाए । ५७औं मिनेटमा इज्ग्जान एलिओस्कीले गोल गर्दै म्यासेडोनियालाई खेलमा फर्काउने संकेत दिए ।

एलेक्सान्डर ट्राजकोभ्स्कीको प्रहार क्रसबारमा लागेर फर्केपछि रिवाउन्डमा कप्तान गोरान पाण्डभले प्रहार गर्न खोजेका थिए । त्यसक्रममा काराइभले फउल गरेपछि रेफ्रीले भिएआरको सहायता लिदै म्यासेडोनियालाई पेनाल्टी प्रदान गरे । इज्ग्जान एलिओस्कीको पेनाल्टीलाई गोलरक्षक जर्ज बुस्चाले बचाएपनि रिवाउन्डमा एलिओस्कीनै गोल गर्न सफल भए ।

६६औं मिनेटमा मालिनोभ्स्कीको प्रहारलाई डिमिट्रिभ्स्कीले बचाए । ८४औं मिनेटमा युक्रेनले पेनाल्टी पाएपनि सदुपयोग गर्न सकेन । मालिनोभ्स्कीको फ्रिकिकलाई पेनाल्टी बक्समा स्टेफन रिस्टोभ्स्कीले ह्यान्ड गरेपछि रेफ्रीले भिएआरको सहयता लिदै युक्रेनलाई पेनाल्टी प्रदान गर्दा मालिनोभ्स्कीको प्रहारलाई गोलरक्षक डिमिट्रिभ्स्कीले बचाए ।

यो जितपछि समूह ‘सी’ मा युक्रेनले दुई खेलबाट ३ अंक जोडेको छ । अंकविहीन म्यासेडोनिया पुछारमा रहेको छ ।