एजेन्सी – भेट्रान डिफेन्डर ड्यानी आल्भेसलाई साविक विजेता ब्राजिलको ओलम्पिक टोलीमा समावेश गरिएको छ । ब्राजिलको ओलम्पिक टोलीका प्रशिक्षक आन्द्रे जर्दिनले टोकियो ओलम्पिकका लागि २३ सदस्यीय टोलीको घोषणा गर्दा ३८ वर्षीय आल्भेसलाई टोलीमा समेटेका हुन् ।

प्रशिक्षक जर्दिनले ड्यानी आल्भेससँगै डिएगो कार्लाेस र सान्तोषलाई बढी उमेर (राख्न पाउने प्रावधान) को खेलाडीको रुपमा समावेश गरेका हुन् । ब्राजिलले सन् २०१६ मा भएको रियो ओलम्पिकमा जर्मनीलाई पेनाल्टी सुटआउटमा ५–४ ले हराउँदै पहिलोपटक ओलम्पिकमा स्वर्ण पदक जितेको थियो ।

त्यतिबेला टोलीमा रहेका कुनैपनि खेलाडी टोलीमा परेका छैनन् । त्यतिबेलाका कप्तान नेयमारले टोकियो ओलम्पिक खेल्ने चाहना राखेपनि उनलाई टोलीमा समावेश गरिएको छैन । आल्भेसले घरेलु मैदानमा जारी कोपा अमेरिका कपमा टोलीमा स्थान बनाउने सम्भावना रहेपनि अन्तिम समयमा चोट बोक्न पुग्दा उनी टोलीबाट बाहिरिएका थिए ।

सोही कारण पनि आल्भेसलाई ओलम्पिक टोलीमा समावेश गरिएको छ । उनले नै टोलीको कप्तानी गर्नेछ । आल्भेसले ३८ वर्षको उमेरमा पनि आफ्नो खेललाई निरन्तरता दिदै उच्च प्रदर्शन गरिरहेका छन् । उनको नेतृत्वमा टोलीले उपाधि रक्षा गर्ने विश्वास लिइएको छ ।

टोकियो ओलम्पिक २३ जुलाईबाट ८ अगस्टसम्म जापानको टोकियोमा आयोजना हुदैछ ।

ब्राजिलको ओलम्पिक टोली

गोलरक्षक – सान्तोष नेटो (एथ्लेटिको पारानाइन्स) र ब्रेननो (ग्रेमियो)

डिफेन्डर – ड्यानी आल्भेस (साओ पाउलो), गाब्रियल मेनिनो (पाल्मेइरस), गुइलहेर्मे एराना (एट्लेटिको मिनेइरो) , गाब्रियल मागलहाइस (आर्सनल) निनो (फ्लुमिनेन्स) र डिएगो कार्लाेस (सेभिया)

मिडफिल्डर – डुगलस लुइज (एस्टन भिल्ला), ब्रुनो गुइमारइस (लियोन), जर्सन (फ्लामेङ्गो), क्लाउडिन्हो (रेडबुल ब्रागान्टिन्हो) र मेथस हेनरिक (ग्रेमियो)

फरवार्ड – मेथस कुन्हा (हर्था बर्लिन), माल्कोम (जेन्ट), एन्टोनी (आयाक्स), पाउलिन्हो (बायर लिभरकुसन) र पेड्रो (फ्लामेङ्गो)