एजेन्सी – युरोपेली च्याम्पियनसिप अन्तर्गत समूह ई को खेलमा शुक्रबार स्वीडेनले स्लोभाकियाको सामना गर्दैछ । खेल सेन्ट पिटर्सबर्ग रंगशालामा नेपाली समयअनुसार साँझ ६:४५ बजे सुरु हुनेछ ।

पहिलो खेलमा स्पेनलाई बराबरीमा रोकेको स्विडेन प्रतियोगितामा पहिलो जित दर्ता गर्न चाहन्छ । स्पेनविरुद्ध बल पोसेसनमा निकै कमजोर रहेपनि स्वीडेनले रक्षात्मक रुपमा बलियो प्रदर्शन गरेको थियो । काउन्टर अट्याकमा पनि स्वीडेनले केहि अवसर सिर्जना गरेको थियो । आजको खेलमा स्वीडेन पछिल्ला गल्तीलाई सुधार्दै पहिलो जित दर्ता गर्ने सुरमा हुनेछ ।

स्लोभाकियाले हालसम्म स्वीडेनलाई पराजित गर्न सकेको छैन । स्लोभाकिया लगातार दोस्रो संस्करण युरोको अन्तिम १६ मा प्रवेश गर्न चाहन्छ । स्वीडेन भने सन् २००० देखि लागतार युरोमा सहभागी भएपनि सन् २००४ यता नकआउट चरणमा प्रवेश गर्न असफल रहँदै आएको छ । आजको खेलमा जित हासिल गरे स्वीडेन अर्को चरणमा पुग्ने सम्भावना बलियो बन्नेछ ।

स्वीडेनका लागि आज फरवार्ड एलेक्जेन्डर इसाकको प्रदर्शन महत्त्वपूर्ण हुनेछ । स्पेनविरुद्ध उनले प्रभाव जमाएपनि अर्का फरवार्ड मार्कस बर्गले अपेक्षित साथ दिन नसक्दा टोलीले गोल गर्न सकेको थिएन । गोलरक्षक रोबिन ओल्सनसँगै डिफेन्डर भिक्टर लिन्डेलफ र मार्क्स ड्यानीएल्सनको जोडीले पनि आज राम्रो प्रदर्शन गर्नुपर्ने छ । मिडफिल्डमा कप्तान सेबास्टियन लार्सन सेट पिसबाट खतरा बन्न सक्छन् ।

अघिल्लो खेलमा पोल्यान्डलाई पराजित गर्दै स्लोभाकियाले दोस्रो सहभागितामा पनि नकआउट चरणमा पुग्ने संकेत देखाएको छ । स्लोभाकियाले सन् २०२१ मा ६ खेलको अपराजित यात्रा कायम राखेको छ । युरोअघि दुवै वार्मअप खेलमा बराबरीमा रोकिएपनि टोलीले पहिलो खेलमा आफ्नो लय देखाएको थियो ।

पोल्यान्डविरुद्ध डिफेन्डर मिलान स्क्रिनियारले गोल गरेका थिए । रोबर्ट लेवान्डोस्कीलाई रोक्न सफल भएका उनले आज अर्का शारीरिक रुपमा निपुण इसाकलाई रोक्नुपर्नेछ । गोलरक्षक मार्टिन डुब्राभ्काले न्युकासलका लागि प्रिमियर लिगमा गरेको प्रदर्शनलाई पहिलो खेलमा पनि निरन्तरता दिएका थिए । कप्तान मारेक हाम्सिक र ओनरेज डुडाको अनुभव टोलीका लागि महत्त्वपूर्ण हुनेछ ।

यस समूहमा स्लोभाकियाको ३ अंक, स्पेन र स्वीडेनको १-१ अंक तथा पोल्यान्ड अंकविहिन छ । समुहको अर्को खेलमा शनिबार पोल्यान्ड र स्पेन भिड्नेछन् ।