एजेन्सी – खेल दौरान नै हृदयघात भएपछि अस्पताल लगिएका डेनमार्क राष्ट्रिय फुटबल टोलीका मिडफिल्डर क्रिस्टियन एरिक्सन अस्पतालबाट डिस्चार्ज भएको डेनिस फुटबल महासंघले जनाएको छ ।

युरोकप २०२० अन्तर्गत गत शनिबार राति फिनल्यान्डविरुद्धको खेलको पहिलो हाफको अन्त्यतिर एरिक्सन अचेत भई अकस्मात मैदानमा ढलेका थिए । एरिक्सन एक्कासी मैदानमा लडेर अचेत भएपछि रेफ्रीले तत्काल स्वास्थ्य टिम मैदान बोलाएका थिए ।

बल उनको स्थानसम्म नआउँदै एक्कासी ढल्न पुगेका एरिक्सनलाई मैदानमा स्वास्थ्य टोलीले सिपिआर (कार्डियो पल्मोनरी रिससिटेसन) पनि दिएका थिए । झन्डै १५ मिनेट मैदानमा नै उपचार गरेपछि उनलाई स्ट्रेचरमा मैदान बाहिर लागिएको थियो । मैदान छाड्दा नै उनको होस आएपछि थप उपचारका लागि उनलाई अस्पताल लागिएको थियो । डेनमार्कका स्वास्थ्य टोलीका सदस्यका अनुसार एरिक्सनको मुटु चल्न छोडिसकेको अवस्थाबाट एइडीको प्रयोगपछि पुन: सुचारु भएको थियो ।

झन्डै डेढ घन्टापछि खेल सुरु हुँदा युरोकपमा पहिलोपटक प्रतिस्पर्धा गरिरहेको फिनल्यान्डले डेनमार्कलाई १–० ले पराजित गरेको थियो । घटनापछि आयोजक युईएफएले मेडिकल इमरजेन्सीको कारण देखाउँदै खेल स्थगित पनि गरेको थियो । तर, दुवै टिमको छलफलपछि खेल झन्डै डेढ घन्टापछि सुरु भएको थियो ।

अस्पताल लगेको केहिबेरमा नै उनले आफ्ना सहकर्मीसँग भिडियो कल गर्दै आफू ठिक रहेको बताएका थिए । डेनिस फुटबल महासंघले पनि उनको स्वास्थ्य अवस्थाबारे नियमित जानकारी दिँदै आएको थियो । बुधबार मात्र एरिक्सनको शरीरमा आइसीडी (इम्प्लान्टेबल कार्डियोभर्टर डेफीब्रिलेटर) जडान गरिने जानकारी दिइएको थियो ।

एरिक्सनलाई सफल शल्यक्रियापछि शुक्रबार अस्पतालबाट डिस्चार्ज गरिएको हो । उनले त्यसपछि राष्ट्रिय टोलीको क्याम्पमा पुगेर आफ्ना सहकर्मी भेटेका थिए । अब उनी घर गएर आफ्नो परिवारसँग समय बिताउनेछन् ।

एरिक्सनले महासंघमार्फत नै आफ्नो धन्यवाद संदेश दिएका छन् । ‘मेरो लागि प्रार्थना गर्नुहुने सबैलाई धन्यवाद । मेरो शल्यक्रिया सफल भयो र यस स्थितिमा म राम्रो छु । फेरी टोलीसँग भेट्न पाउँदा म खुसी छु । म सोमबार पनि रसियाविरुद्ध खेलमा टोलीको हौसला बढाइरहेको हुनेछु,’ उनले भने ।

आइसीडीको प्रयोगले मुटुको धड्कनमा समस्या आउँदा सहयोग पुर्याउँछ । यसले मुटुको धड्कन रोकिएको खण्डमा एइडी जस्तै विद्युतीय झट्का दिन्छ जसले मुटुको चाल पुन: सुरु हुन्छ । अस्पतालको सल्लाह अनुसार नै एरिक्सनले यो प्रयोग गर्न सहमति जनाएका थिए ।

एरिक्सनअघि नेदरल्यान्ड्सका डिफेन्डर डेली ब्लिन्डले पनि यो प्रयोग गर्दै आएका छन् । ब्लिन्डले युरोको दुवै खेल सुरुवाती रोजाइमा खेलेका छन् । स्पेनिस गोलरक्षक इकार कासिलासले पनि यो उपकरण जडान गरेका छन् । तर उनले खेल जीवनबाट भने संन्यास लिइसकेका छन् ।

यो पनि : एरिक्सन घटना र नेपालमा एन्फाको पूर्व तयारी