एजेन्सी – युरोपेली च्याम्पियनसिपको समूह चरणको दोस्रो खेलमा आज राति पोर्चुगल र जर्मनीबीचको रोमाञ्चक खेल हुदैछ । खेल जर्मनीको घरेलु मैदान एलिएन्ज एरिना म्युनिखमा नेपाली समयअनुसार राति ९:४५ बजे हुनेछ ।

जर्मनीले घरेलु मैदानमा पोर्चुगलको सामना गर्दा टोलीलाई चर्को दबाब हुनेछ । टोलीको उद्देश्य क्रिस्टियानो रोनाल्डोलाई रोक्ने र आफ्नो स्थिति अनुकूल बनाउनु हुनेछ । पहिलो खेलमा फ्रान्ससँग हार बेहोरको जर्मनीको लागि समूह चरण पार गर्नको लागि यो खेल निकै महत्वको रहँदा पोर्चुगल समूहमा लगातार दोस्रो जित निकाल्दै नकआउट चरण पुग्ने दाउमा हुनेछ ।

जर्मनी एलिएन्ज एरिनामा आफ्नो टिम रोनाल्डो र पोर्चुगललाई रोक्न सफल हुनेमा विश्वस्त छ । जर्मनीका लागि रोनाल्डो मात्र चुनौती नभई बुन्डेसलिगाकै प्रमुख खेलाडी आन्द्रे सिल्भा पनि टाउको दुखाईको विषय बन्न सक्नेछन् । गत सिजन आइनट्राख्ट फ्रांन्कफर्टका लागि सिल्भाले २८ गोल गरेका उनले राम्रोसँग नै जर्मन फुटबल बुझेका छन् ।

अर्काे तथ्य के छ भने रोनाल्डोले जर्मनीविरुद्ध चार खेल खेल्दा अहिलेसम्म गोल गर्न सकेका छैनन् । पोर्चुगललाई रोक्न टोलीसँग भेट्रान गोलरक्षक तथा कप्तान म्यानुयल नुएर, इम्री क्यान, म्याट हमेल्स, एन्टेनियो रुडिगर, म्याथियस जिन्टर र निकलस सुल रहेका छन् । मिडफिल्डमा टोनी क्रुस, थोमस मुलर, इल्केए गुन्डोगान, यासुवा किम्मिख, काई हाभर्टज र जमल मुसियाला टोलीमा रहँदा टिमो वेर्नर, लिरोए साने, सर्ज जिनाब्री र केभिन भोलान्ड पनि टोलीमा रहनेछन् ।

यता, पोर्चुगल समूहमा लगातार दोस्रो जित निकाल्दै नकआउट चरणमा पुग्ने दाउमा हुनेछ । हंगेरीविरुद्ध पाएको जितले हौसिएको पोर्चुगल घरेलु टोली जर्मनीविरुद्ध आत्मविश्वासी भएर मैदान उत्रनेछ । टोलीका लागि मुख्य हतियार कप्तान रोनाल्डो नै हुनेछ । रोनाल्डो पनि आफ्नो गोलसङ्ख्या बढाउने अभियानमै हुनेछ ।

यी पोर्चुगाली स्टारले पाँच युरो संस्करणमा ११ गोल गरिसकेका छन् । पोर्चुगलले हंगेरीमाथि प्राप्त ३–० जितमा उनले दुई गोल गरेका थिए । रोनाल्डोले पोर्चुगलका लागि १ सय ७६ गोलमा १ सय ६ गोल गरिसकेका छन् । उनी सर्वकालीन सर्वाधिक गोलको कीर्तिमानबाट ३ गोल पछि छ । सन् १९९३ देखि २००६ बीच इरानका अली दाईले कीर्तिमानी १ सय ९ गोल गरेका थिए । यो कीर्तिमान रोनाल्डोले भंग गर्ने सम्भावना छ ।

टोलीसँग रोनाल्डोसँगै ब्रुनो फर्नान्डेस, डिएगो जोटा र बर्नाडो सिल्भा, आन्द्रे सिल्भा, विलिय कार्भाल्हो, डानिलो पेरेइरा, राफयल गुरेइरो, रुवेन डियास, पेपे, नेल्सन सेमेडो, रुई प्याट्रिसियो लगायता खेलाडी छन् । यस्तै राफा सिल्भा, रेनाटो सान्चेज, जोओ मौटिन्हो, जोआओ फेलिक्स र डिएगो डालोट पनि टोलीमा रहेका छन् ।

यि दुई टोलीबीचको १८ भेटमा जर्मनी हावी छ । टोलीले १० खेल आफ्नो पक्षमा पार्दा पोर्चुगलले ३ खेल मात्रै जितेको छ । ५ खेल बराबरीमा सकिएको छ । पछिल्लो चार भेटमा पोर्चुगलले जर्मनीलाई हराउन सकेको छैन । यि दुई टोलीले पछिल्लो पटक २०१४ को विश्वकपमा प्रतिस्पर्धा जर्मनीले ४–० को सानदार जित निकालेको थियो ।

यो समूह ‘एफ’ मा एक चरणको खेल सकिदा पोर्चुगल र फ्रान्सको समान ३ अंक रहेपनि गोल अन्तरमा पोर्चुगल शीर्ष तथा फ्रान्स दोस्रो स्थानमा रहेको छ । अंकविहीन जर्मनी तेस्रो र हंगेरी पुछारमा छ ।