एजेन्सी – स्पेन र पोल्यान्ड एक अर्काविरुद्ध मैदानमा उत्रँदा दुवै टोलीलाई एउटै दवाव छ, त्यो हो निश्चित जित । पहिलो खेलमा जित हासिल गर्न नसकेका दुवै टोलीलाई समूह चरण पार गर्ने सम्भावना जीवित राख्न जित बाहेकको विकल्प छैन ।

किनभने समूह ‘ई’ मा यि दुई टोली स्वीडेन र स्लोभाकियासँग पछि परिसकेका छन् । स्वीडेनको ४ तथा स्लोभाकियाको ३ अंक छ । स्पेनको १ तथा पोल्यान्ड अंकविहीन छ । यि दुई टोलीबीचको खेल स्पेनको सेभियामा नेपालीसमयअनुसार आज राति १२:४५ बजे हुनेछ ।

स्पेनले स्विडेनविरुद्ध ७५ प्रतिशत बल नियन्त्रणमा राखेपनि गोल गर्न चुकेको थियो । अझ भनौ ८५२ पास खेलेको स्पेनको टिमले गोल गर्नमात्र चुकेको  थियो । त्यसैले स्पेन जतिबेला पोल्यान्डविरुद्ध मैदान उत्रन्छ, उसको ध्यान गोलमै केन्द्रित हुनेछ ।

अल्भारो मोराटा, फेरान टोरेस, एडमा ट्राओरे, जेरार्ड मोरेनो, पाब्लो साराविया, पेड्री, रोड्री, मार्काेस लोरेन्टे, कोकी, थियागो अलकान्तरा, सर्जियो बुस्क्वेट्स, एरिक गार्सिया, पाउ टोरेस, एमेरिक लापोर्टा, जोडी अल्वा, सेसर एज्पिल्क्विेटा र युनाइ सिमोन जस्ता नाम चेलेका खेलाडी टोलीमा रहेका छन् ।

यता, बलियो स्पेनसँग उसकै मैदानमा खेल्दा पोल्यान्डलाई पनि ठुलो दवाव हुनेछ । आफ्नो खेलमा स्लोभाकियाको हातबाट स्तब्धपूर्ण हार बेहोरेको पोल्यान्डलाई समूह चरण पार गर्न जितबाहेकको विकल्प छैन । रोबर्ट लेवान्डोस्कीले स्पेनविरुद्ध केही गर्न सक्छन् त भन्ने आशा गरिएको छ ।

मिडफिल्डर ग्रेजगोर्ज क्राचोवियाक प्रतिबन्धमा रहँदा पोल्यान्डलाई समस्या हुन सक्नेछ । टोलीसँग कारोल स्वीडर्सकी, पिओटर जिलेन्स्की, मेट्सज क्लिच, कामिल जिलिक र गोलरक्षक वजसिएस सेजेस्नीको साथ रहेको छ ।

यि दुई टोलीको हालसम्मको १० भिडन्तमा स्पेन ८ खेलमा विजयी भएको छ । एक खेल पोल्यान्डले जित्दा एक खेल बराबरीमा सकिएको छ । पोल्यान्डले १९८० मा २–१ को जित निकालेको थियो । त्यसपछि १९९४ मा १–१ गोलको बराबरी खेलेको थियो । त्यसपछिको सबै तीन भेटम स्पेन विजयी भएको छ । पछिल्लोपटक यि दुई टोलीले २०१० मा प्रतिस्पर्धा गर्दा स्पेनले ६–० को सानदार जित हात पारेको थियो ।