एजेन्सी – पोल्यान्डका मिडफिल्डर कापर कोजलोस्कीले स्पेनविरुद्धको खेलमा वैकल्पिक खेलाडीका रुपमा मैदान प्रवेश गर्दै युरोपेली च्याम्पियनसिपमा सबैभन्दा कम उमेरको खेलाडी बन्ने कीर्तिमान राखेका छन् ।

उनले ६ दिन अघि यसै युरोमा इंग्ल्यान्डका मिडफिल्डर जुड बेलिंग्हमले क्रोएसियाविरुद्ध खेलमा वैकल्पिक खेलाडीका रुपमा मैदान प्रवेश गर्दै राखेको कीर्तिमान भंग गर्दै आफ्नो नाममा लेखाएका हुन् ।

पोलिस क्लब पोगोन सेजेसिनबाट व्यावसायिक फुटबल खेल्दै आएका कोजलोस्कीले १७ वर्ष २ सय ४६ दिनको उमेरमा खेल्दै उक्त कीर्तिमान कायम गरेका हुन् । बेलिंग्हमले ६ दिन अघि १७ वर्ष ३ सय ४९ दिनको उमेरमा खेल्दै कीर्तिमान कायम गरेका थिए । त्यसअघि यो कीर्तिमान सन् २०१२ मा नेदरल्याण्डका जेट्रो विलेम्सले १८ वर्ष ७१ दिनको उमेरमा खेल्दै कीर्तिमान बनाएका थिए ।

कोजलोस्की ५५ औ मिनेटमा इंग्लिस क्लब लिड्स युनाइटेडका मेटेअस्जको स्थानमा मैदान छिरेका थिए । उनी छिर्नुअघि खेल १–१ गोलको बराबरीमा रहेको थियो । उनी छिरेको दुई मिनेटमा नै स्पेनले पेनाल्टी पवाएपनि जेरार्ड मोरेनोले गोल गर्न नसक्दा खेल १–१ गोलको बराबरीमा टुंगिएको थियो ।

कापर कोजलोस्कीले पोल्यान्डबाट चार क्याप जितिसकेका छन् । उनले २९ मार्च २०२१ मा विश्वकप छनोटमा एन्डोरालाई ३–० ले पराजित गरेको खेलबाट सिनियर टोलीमा डेब्यु गरेका थिए । त्यतिबेला उनी ७३औं मिनेटमा पिओटर जिलेन्स्कीको स्थानमा मैदान प्रवेश गरेका थिए । त्यसपछि उनले मैत्रीपुर्ण खेलमा रसिया र पोल्यान्डसँगको खेल खेलिसकेका छन् ।

कोजलोस्की र बेलिंग्हम दुवैलाई अब युरोमा सर्वाधिक कान्छा गोलकर्ता बन्ने अवसर पनि रहेको छ । उक्त कीर्तिमान स्विट्जरल्यान्डका योहान भन्लान्थेनको नाममा रहेको छ । उनले युरो २००४ मा फ्रान्सविरुद्ध १८ वर्ष १ सय ४१ दिनको उमेरमा गोल गरेका थिए ।

यस्तै युरोको फाइनलमा खेल्ने कान्छा खेलाडी भने पोर्चुगलको रेनाटो सान्चेस हुन् । गत संस्करणको उपाधि पोर्चुगलले जित्दा सान्चेसको उमेर १८ वर्ष ३ सय २८ दिन रहेको थियो । पोल्यान्ड र इंग्ल्यान्ड फाइनल पुगेको खण्डमा कोजलोस्की र बेलिंग्हमलाई उक्त कीर्तिमान आफ्नो नाम गर्ने अवसर समेत हुनेछ ।

तर, समूह ‘ई’ मा पोल्यान्डको नकआउट चरण पुग्ने सम्भावना न्युन छ । पोल्यान्डलाई नकआउट चरण पार गर्न अन्तिम खेलमा स्वीडेनलाई हराउनु पर्नेछ । स्लोभाकिया र स्पेनले अंक गुमाउनु पर्नेछ । दुई खेलमा १ अंक जोडेको पोल्यान्ड पुछारमा छ । यो समूहमा स्वीडेन ४ अंकसहित शीर्षस्थानमा रहँदा स्लोभाकियाको ३ तथा स्पेनको दुई अंक छ ।

यस्तै बेलिंग्हमको इंग्ल्यान्ड समूह ‘डी’ मा ४ अंक जोडेर दोस्रो स्थानमा रहेको छ । समूह चरणको अन्तिम खेलमा चेकलाई हराउन सके इंग्ल्यान्ड समूह विजेताको रुपमा नकआउट चरणमा प्रवेश गर्नेछ ।