एजेन्सी – इंग्लिस क्लब लिभरपुलका मिडफिल्डर जेर्डान शाकिरीको दुई गोल मद्दतमा स्विट्जरल्यान्डले टर्कीलाई पराजित गर्दै युरोपेली च्याम्पियनसिपको नकआउट चरण पुग्ने सम्भावना जीवित राखेको छ ।

अजरबैजानस्थित बाकी ओलम्पिया स्टेडियम बाकुमा आइतबार राति भएको खेलमा स्वीट्जरल्यान्डले टर्कीलाई ३–१ ले पराजित गर्दै समूहमा तेस्रो स्थान हासिल गरेको हो । टर्की अंकविहीन हुदै समूह चरणबाटै बाहिरिएको छ ।स्वीट्जरल्यान्डले खेलको छैटौं मिनेटमा नै हरिस सेफेरोभिचको गोलमा अग्रता लिएको थियो । स्टिभन जुबरको पासमा उनले सुन्दर फिनिस गर्दै टोलीलाई अग्रता दिलाएका थिए ।

२६औं मिनेटमा शाकिरीले दर्शनीय गोल गर्दै अग्रता दोब्बर पारेका थिए । जुबरकै पासमा शाकिरीले पेनाल्टी क्षेत्रको ठिक बाहिरबाट गरेको प्रहार टप कर्नरमा गोल भएको थियो । शकिरीले आफ्नो बायाँ खुट्टाले गरेको प्रहारलाई गोलरक्षक उगुर्कान साकिरले बचाउने कुनै अवसर नै पाएनन् ।

दोस्रो हाफमा टर्कीले आक्रमणमा जोड दिँदै खेलमा फर्कने प्रयास गरेको थियो । ६२औं मिनेटमा इरफान च्यान काभेचीले गोल अन्तर घटाउँदै टर्कीलाई खेलमा फर्कने संकेत दिए । पेनाल्टी क्षेत्र बाहिरबाट उनले गरेको शक्तिशाली प्रहार सिधै गोलमा परिणत भएको थियो ।

६८औं मिनेटमा शाकिरीले व्यक्तिगत दोस्रो गोल गर्दै स्वीट्जरल्यान्डको २ गोलको अग्रता पुनः स्थापना गरे । जुबरले झाकासँग पास सासाटफेर गर्दै बनाएको मुभमा गोल सम्भव भएको थियो । जुबरले दिएको अन्तिम लो क्रसलाई शाकिरीले गोलमा परिणत गर्दै स्वीट्जरल्यान्डलाई जित नजिक पु¥याए । त्यसपछि थप गोल निस्कन नसक्दा स्वीस टोली विजयी हुन सफल भयो ।

यो समूह ‘ए’ बाट इटाली शतप्रतिशत जितसहित समूह विजेता र वेल्स समूह उपविजेताको रुपमा अघि बढ्दा टर्कीमाथिको जितसँगै स्वीस टोली उत्कृष्ट तेस्रो टोलीको रुपमा नकआउट चरण पुग्ने सम्भावना जीवितै रहेको छ । यसका लागि स्वीस टोलीले अब समूह ‘डी’, ‘ई’ र ‘एफ’ को नतिजा कुर्नुपर्ने हुन्छ ।

इटालीले समूहमा ९ अंक जोड्यो । वेल्स र स्वीट्जरल्यान्डको समान ४–४ अंक भएपनि गोलअन्तरको आधारमा वेल्स दोस्रो स्थानमा रहँदै अन्तिम १६ मा प्रवेश गन सफल भयो । यसअघि वेल्स र स्विट्जरल्यान्डको खेल १–१ को बराबरीमा सकिएको कारण गोलअन्तरले नै समूहमा स्थानको छिनोफानो भएको हो ।