एजेन्सी – इंग्ल्यान्डले युरोपेली च्याम्पियनसिपको समूह ‘डी’ को आफ्नो अन्तिम खेलमा मंगलबार चेक गणतन्त्रको सामना गर्नेछ । खेल वेम्वली स्टेडियम लन्डनमा नेपाली समयअनुसार राति १२:४५ बजे हुनेछ ।

दुवै टोलीले समूह चरण पार गरिसकेकाले यो खेलको नतिजाले नै समूह विजेताको निर्धारण गर्नेछ । सोही कारण दुवै टोलीको जितको लागि मैदान उत्रनेछन् । दुवै टोलीमा शीर्षताको होड रहनेछ । दुवै टिमले समान एक जित र बराबरीको नतिजा निकालेका छन् ।

यो होडमा इंग्ल्यान्डको तुलनामा चेक गोलअन्तरका आधारमा केही माथि रहेको छ । बराबरीको नतिजाले चेक नै समूह विजेता बन्नेछ । भनौ टोलीका लागि एक अंक नै समूह विजेताका रूपमा नकआउट पुग्न पर्याप्त हुनेछ । चेकले प्रतियोगितामा अहिलेसम्म गरेका तीन गोलमध्ये सबै प्याट्रिक सिकको नाममा छ । उनी नै इंग्ल्यान्डविरुद्ध मुख्य हतियार हुनेछन् ।

लयमा रहेका सिकलाई रोक्नु इंग्ल्यान्डका लागि चुनौती हुनसक्छ । यस्तै जाकुव जान्कटो, भ्लादिमिर दारिदा, लुकास मासोपुस्ट, थोमस होलेस, थोमस सौसेक, भ्लादिमिर कोउफल, ओन्ड्रेज सेलुस्टका, थोमस कालस र गोलरक्षक थोमस भक्लिक टोलीमा रहेका छन् ।

नकआउट चरणमा स्थान बनाइसकेको इंग्ल्यान्ड लयमा रहेको चेकलाई हराउँदै समूह विजेता बन्ने लक्ष्यमा हुनेछ । चेकसँगको बराबरी या हारले पनि इंग्ल्यान्डलाई केही फरक पार्नेछैन । जितले पहिलो, बराबरीले समूहमा दोस्रो र हारले तेस्रो भएर अघि बढ्ने छ । छिमेकी स्कटल्यान्डविरुद्धको पछिल्लो खेलमा बराबरी खेलेको इंग्ल्यान्ड घरमै भइरहेको आफ्नो अन्तिम लिग चरणको खेलमा राम्रो नतिजा निकल्दै अघि बढ्ने लक्ष्यमा हुनेछ ।

इंग्ल्यान्डले फिनिसिङ गर्न सकिरहेको छैन । टोलीसँग कप्तान ह्यारी केन, मार्कुस रासफोर्ड, जेडान सान्चो, ज्याक ग्रेयालिस, जोर्डन हेन्डरसन, डिक्लन रिस, ह्यारी मगाएर, जोन स्टोन्स, केएल वाल्कर, लुका सा र गोलरक्षक जोर्डन पिकफोर्ड रहेका छन् । यस्तै रहिम स्टर्लिङ, फिल फोडेन, बुकायो साका, डोमिनिक काल्भर्ट लेविन, जुड बेलिङ्घम, केल्भिन फिलिप्स, रिस जेम्स र काइरन ट्रिपिएर पनि टोलीमा रहेका छन् ।

मेसन माउन्ट र बेन चिल्वेल भने खेलका लागि उपलब्ध छैनन् । स्कटल्यान्डविरुद्ध खेलपछि बिली गिल्मरसँग नजिकको सम्पर्कमा आएका कारण दुवै आइसोलेसनमा छन् । गिल्मरलाई कोरोना संक्रमण देखिएसँगै उनी १० दिनका लागि आइसोलेसनमा छन् । गिल्मर इंग्ल्यान्डविरुद्ध स्टार अफ द म्याच भएका थिए ।

यि दुई टोलीको पछिल्लो दुई भेटमा दुवै टोलीमा समान एक खेल जितेका छन् । चेकले पछिल्लोपटक २०१९ मा युरो छनोटमा इंग्ल्यान्डलाई २–१ ले हराएको थियो । त्यसअघि २०१९ मै इंग्ल्यान्डले ५–० को सानदार जित निकालेको थियो । जसमा रहिम स्टर्लिङले ह्याट्रिक पुरा गरेका थिए । स्टर्लिङलाई चेकविरुद्ध पुनः नायक हुने अवसर छ ।

यो पनि : फ्रान्स र इंग्ल्यान्डसहित ५ टोली नकआउट चरणमा