एजेन्सी – पेरिस सेन्ट जर्मेन (पिएसजी) ले रियल म्याड्रिडका पूर्व कप्तान सर्जियो रामोससँग छलफल अघि बढाएको सञ्चारमाध्यमले उल्लेख गरेको छ । रामोसले यसै महिना रियलसँगको १६ वर्षे यात्रा टुंगाएका थिए ।

नयाँ सम्झौताका लागि दुई पक्षबीच सहमति हुन नसकेपछि रामोसले क्लब छाड्ने निर्णय लिएका थिए । थुप्रै क्लबले भेट्रान रक्षकलाई भित्राउन चाहेका छन् । त्यसमा पिएसजी भने अन्य क्लब भन्दा रामोससँग सम्पर्क गर्ने सवालमा अगाडि रहेको छ ।

पिएसजीले रामोससामु प्रारम्भिक प्रस्ताव राखेको छ । दुई पक्षबीच धेरै पटक संवाद भएपनि अझै टुंगो भने लागिसकेको छैन । यरोपका थुप्रै क्लबले देखाएपनि रामोस आफू भने रियलमै रहन चाहन्थे । रियल उनलाई १ वर्षको सम्झौता गर्न तयार हुँदा उनले भने दुई वर्षको सम्झौता गर्न चाहेका थिए । पछि रामोसले आफैं १ वर्षका लागि नविकरण गर्ने बताउँदा क्लबले त्यो प्रस्ताव फिर्ता लिइसकेको जनाएको थियो ।

चोट कारण गत सिजन धेरै समय मैदान बाहिर रहेका रामोस यसपटक स्पेनको युरो टोलीमा पर्न सकेनन् । उनको चाहना च्याम्पियन्स लिग खेल्ने टोलीमा आबद्ध हुने रहेको बताइन्छ । म्यानचेस्टर युनाइटेड, चेल्सी र म्यानचेष्टर सिटी पनि रामोसमाथि चासो राखेका छन् । एसी मिलान, रोमा, युभेन्ट्स र इन्टरले पनि रामोसलाई भित्राउन चाहेको बताएको छ । यद्दपी पिएसजी रामोसका लागि उपयुक्त टोली देखिएको छ ।

आफ्नो विदाईमा रियलले राखेको पत्रकार सम्मेलनमा रामोसले अरु क्लबका विषयमा कहिल्यै नसोचेको बताएका थिए । ‘जतिबेला म छलफलका लागि उपलब्ध भए । त्यति बेला केहि फोन आएका थिए । तर मैले रियल छाड्ने विषयमा सोचेको थिइनँ’, उनले भने,’अब भने राम्रो विकल्पका बारेमा सोच्नुपर्नेछ ।’

अर्को ला लिगा टोली सेभिल्लाका बारेमा पनि पत्रकार सम्मेलनमा प्रश्न उठेको थियो । ‘सेभिल्ला अर्को क्लब हो जो मेरो मुटुमा बसेको छ । मैले त्यहाँ राम्रो समय बिताएको थिएँ’, रामोसले भनेका थिए, ‘तर अहिलेको समयमा केहि अघि बढेको छैन र दुवै आफ्नो स्थानमा ठिक छौं । बार्सिलोनामा भने जाने सम्भावना छैन । बार्सिलोनाको जर्सीमा तपाईले सर्जियो रामोसलाई कहिल्यै देख्नुहुनेछैन ।’