एजेन्सी – युरोपेली च्याम्पियनसिप २०२० अन्तर्गत समूह चरणको खेल समापन भएका छन् । सहभागी २४ टोलीमध्य १६ टोली अर्को चरण प्रवेश गर्दा ८ टोलीको यात्रा समाप्त भइसकेको छ ।

अपेक्षा गरेअनुसार नै यसपटक युरोमा ठूला टोली सबैले अन्तिम १६ मा स्थान बनाएका छन् । अधिकांश स्टार खेलाडीबाट पनि सोचेजस्तो प्रदर्शन नै भएको छ । इटाली र नेदरल्यान्ड्सले शत प्रतिशत जितको नतिजा निकाल्दै अन्तिम १६ मा स्थान बनाए । बेल्जियम र फ्रान्सले पनि आफ्ना समर्थकलाई खुसी बनाएका छन् ।

समूह चरणमा उत्कृष्ट प्रदर्शन गर्ने ५ खेलाडी यसप्रकार छन् :

डेन्जेल डम्फ्राइज (डिफेन्डर, नेदरल्यान्ड्स) :

डच राइट ब्याक डेन्जेल डम्फ्राइज सम्भवत यो प्रतियोगिताबाट उदाएका स्टारमध्य पर्छन् । डच क्लब पीएसभीका लागि खेल्दै आएका उनले डिफेन्समा मात्र नभएर आक्रमणमा पनि उत्तिकै प्रभाव छोडेका छन् । विपक्षी डिफेन्सलाई दबाबमा राख्दै उनले आफैं दुई गोल समेत गरेका छन् ।

जिओर्जिनिओ वाइनाल्डम (मिडफिल्डर, नेदरल्यान्ड्स) :

युरो सुरु भएपछि नै लिभरपुलबाट फ्रान्सेली क्लब पिएसजी पुगेका वाइनाल्डमले प्रभावशाली प्रदर्शन गरेका छन् । मैदानको सबै भागमा पुगेर खेल्ने उनले प्रतियोगितामा ३ गोल गरिसकेका छन् । आक्रमण र डिफेन्सबीच समन्वयकारी भूमिकामा उनी उत्कृष्ट देखिएका छन् ।

म्यानुएल लोकाटेली (मिडफिल्डर, इटाली)

इटालीको मिडफिल्डमा खेल्दै आएका लोकाटेलीले सन्तुलन कायम गर्न प्रभावकारी भूमिका निर्वाह गरेका छन् । स्विट्जरल्यान्डविरुद्ध २ गोल गर्दै टोलीलाई २-० को जित दिलाएका उनको भूमिका भने रक्षात्मक बढी छ । विपक्षी आक्रमणलाई निस्तेज पारेर आफ्नो आक्रमणलाई चलायमान बनाउने जिम्मेवारीमा उनी खरो उत्रिएका छन् ।

क्रिस्टियानो रोनाल्डो (फरवार्ड, पोर्चुगल)

रोनाल्डोबाट पोर्चुगलले यस प्रतियोगितामा गोलको आशा गरेको थियो, र उनी त्यसमा उत्कृष्ट सावित भएका छन् । ३ खेलमा ५ गोल गर्दै उनले टोलीलाई ग्रुप अफ डेथबाट नकआउट चरणमा पुर्याए । अन्तर्राष्ट्रिय फुटबलमा सर्वाधिक गोल गर्ने कीर्तिमान बराबर गरेका उनले आक्रमणमा अन्य खेलाडीलाई पनि राम्रो साथ दिएका छन् ।

रोमेलु लुकाकु (फरवार्ड, बेल्जियम)

रसियाविरुद्ध २ गोल गर्दै सुखद सुरुवात गरेका लुकाकुले आफ्नो प्रदर्शनलाई निरन्तरता दिएका छन् । गोल्डेन बुटको दावेदारीमा रोनाल्डोभन्दा पछि रहेपनि उनले आफ्नो खेलले भने बेल्जियमलाई निकै सहयोग पुर्याएका छन् । आक्रमक मुभमा सामेल हुँदै उनले टोलीलाई गोल गर्न पनि अवसर सिर्जना गरेका छन् ।

यो पनि : युरो कप : अन्तिम १६ मा को-को भिड्दै? (नेपाली समयअनुसार)